Paris Olympics 2024 : पॅरिस ऑलिम्पिकच्या ओपनिंग सेरेमनीआधी मोठा राडा, तोडफोड, जाळपोळ
Paris Olympics 2024 : आज पॅरिसमध्ये भव्य ऑलिम्पिक स्पर्धेच्या ओपनिंग सेरेमनीचा सोहळा रंगणार आहे. पुढचे काही दिवस सगळ्या जगाच लक्ष पॅरिसकडे असेल. मात्र, त्याआधी पॅरिसमध्ये मोठा हिंसाचार, तोडफोड झाली आहे.
![Paris Olympics 2024 : पॅरिस ऑलिम्पिकच्या ओपनिंग सेरेमनीआधी मोठा राडा, तोडफोड, जाळपोळ Paris Olympics 2024 : पॅरिस ऑलिम्पिकच्या ओपनिंग सेरेमनीआधी मोठा राडा, तोडफोड, जाळपोळ](https://images.tv9marathi.com/wp-content/uploads/2024/07/paris-olympics-2024-1.jpg?w=1280)
पॅरिस ऑलिम्पिक ओपनिंग सेरेमनीच्या काहीतास आधी फ्रान्समध्ये मोठा राडा झाला आहे. जाणीवपूर्वक हाय-स्पीड रेल्वे नेटवर्कला लक्ष्य करण्यात आलं. रेल्वे मार्गावर जाळपोळ करण्यात आली. या हिंसाचारामुळे ट्रान्सपोर्ट सिस्टिमवर परिणाम झाला आहे. आज 26 जुलैपासून फ्रान्सची राजधानी पॅरिसमध्ये ऑलिम्पिक स्पर्धेला सुरुवात होत आहे. फ्रान्सची ट्रेन ऑपरेटर कंपनी एसएनसीएफने शुक्रवारी न्यूज एजन्सी AFP ला या संपूर्ण घटनेची माहिती दिली. फ्रान्सच्या हाय-स्पीड रेल्वे नेटवर्कवर हल्ला करुन जाळपोळ करण्यात आली असं एसएनसीएफकडून सांगण्यात आलं.
यावेळी तोडफोड करण्याचाही प्रयत्न झाला. ट्रेन नेटवर्कला पंगु बनवण्यासाठी करण्यात आलेला हा मोठा हल्ला आहे. यामुळे अनेक ट्रेन्स रद्द कराव्या लागल्या असं तपास करणाऱ्या एका सूत्राने AFP ला सांगितलं. पॅरिसमध्ये भव्य ऑलिम्पिक सेरेमनीची तयारी सुरु असताना हे हल्ले करण्यात आले. ओपनिंग सेरेमनीमध्ये 7,500 एथलीट, 300,000 प्रेक्षक आणि वीआयपी सहभागी होणार आहेत.
ओपनिंग सेरेमनीला बसू शकतो हवामानाचा फटका
या हल्ल्यामुळे 8 लाख ट्रेन प्रवासी प्रभावित झालेत, असं एसएनसीएफ समूहाच्या अध्यक्षांनी बीएफएमटीवीला सांगितलं. france24.com च्या रिपोर्ट्नुसार यूरोस्टार (रेलवे कंपनी) ने सांगितलं की, लंडन आणि पॅरिस दरम्यान तोडफोडीच्या घटनांमुळे रेल्वे सेवा बाधित झाली आहे. अनेक ट्रेन्स रद्द झाल्या. प्रवाशांचा प्रवासाचा वेळ वाढला. सीन नदी किनारी ऑलिम्पिकची ओपनिंग सेरेमनी होणार आहे. यावेळी हवामानाचा फटका बसू शकतो. हवामान विभागाने शुक्रवारी पावसाचा अंदाज वर्तवला आहे. दुपारी हवामान स्वच्छ राहिलं. संध्याकाळी पाऊस कोसळू शकतो. याचवेळी ओपनिंग सेरेमनी होणार आहे.