OMG! पाणीपुरी विकून खरेदी केली थार; आनंद महिंद्रासुद्धा कौतुक करण्यापासून स्वत:ला रोखू शकले नाही
पाणीपुरी विकून एका तरुणीने चक्क महिंद्रा थार विकत घेतली आहे. या तरुणीचा व्हिडीओ सध्या सोशल मीडियावर व्हायरल होत आहे. महिंद्रा ग्रुपचे चेअरमन आनंद महिंद्रा यांनीसुद्धा हा व्हिडीओ शेअर करत तरुणीचं कौतुक केलं आहे.
मुंबई : 24 जानेवारी 2024 | महिंद्रा थार या गाडीची लोकांमध्ये किती क्रेझ आहे, याची उदाहरणं अनेकदा पहायला मिळतात. नुकताच सोशल मीडियावर एका पाणीपुरी विकणाऱ्या तरुणीचा व्हिडीओ व्हायरल होत आहे. बी.टेकचं शिक्षण घेतलेल्या तरुणीने पाणीपुरी विकून जमा केलेल्या पैशांमध्ये महिंद्रा थार विकत घेतली आहे. महिंद्रा ग्रुपचे चेअरमन आनंद महिंद्रासुद्धा हा व्हिडीओ सोशल मीडियावर शेअर करण्यापासून स्वत:ला रोखू शकले नाहीत. या तरुणीबद्दल आनंद महिंद्रा काय म्हणाले ते पाहुयात..
महिंद्रा थार ही एक अशी एसयूव्ही आहे, ज्याची क्रेझ संपूर्ण देशभरात पहायला मिळते. तापसी उपाध्याय नावाच्या तरुणीने बी.टेकचं शिक्षण पूर्ण केलं आहे. मात्र तिने कोणतीही नोकरी न करता फक्त पाणीपुरी विकून थार घेण्याचं स्वप्न पूर्ण केलं आहे. स्वत: आनंद महिंद्रा यांनी तिचा व्हिडीओ शेअर केला आहे. आनंद महिंद्रा यांनी एक्सवर (ट्विटर) पोस्ट लिहित ऑफ-रोड गाडीबद्दल सांगितलं. ते म्हणाले की ‘या गाडीने लोक अशा जागी जाऊ शकतात, जिथे ते पहिले कधी जाऊ शकत नव्हते. ही गाडी लोकांना अशक्य वाटणाऱ्या गोष्टींचा अनुभव घेण्याची संधी देते. सर्वांत महत्त्वाची गोष्ट म्हणजे लोक त्यांची स्वप्नं पूर्ण करू शकतात. त्यामुळे मला हा व्हिडीओ का आवडला ते तुम्हाला आता नीट समजू शकतं.’ अशी पोस्ट लिहित त्यांनी तापसीचा व्हिडीओ शेअर केला.
आनंद महिंद्रा यांची पोस्ट
What are off-road vehicles meant to do?
Help people go places they haven’t been able to before..
Help people explore the impossible..
And in particular we want OUR cars to help people Rise & live their dreams..
Now you know why I love this video…. pic.twitter.com/s96PU543jT
— anand mahindra (@anandmahindra) January 23, 2024
महिंद्रा थार ही गाडी तिच्या फीचर्समुळे विशेष चर्चेत असते. ही गाडी ऑफ रोड एसयूव्ही रिअर व्हील ड्राइव्ह आणि फोअर व्हील ड्राइव्ह अशा दोन्ही व्हर्जनमध्ये उपलब्ध आहे. रिअर व्हील ड्राइव्हमध्ये 1.5 लीटर डीझेल इंजिनची पॉवर मिळते, जी 6 स्पीड मॅन्युअल गिअरबॉक्ससह येते. याशिवाय 2.0 लीटर टर्बो-पेट्रोल इंजिन पर्यायसुद्धा उपलब्ध आहे. ज्यामध्ये 6 स्पीड ऑटोमॅटिक गिअरबॉक्स मिळतो.
थार 4WD व्हेरिएंटमध्ये 2.2 लीटर डीझेल इंजिनची पॉवर देण्यात आली आहे. याशिवाय 2.0 लीटर टर्बोचार्ज पेट्रोल इंजिनचा पर्यायसुद्धा मिळेल. दोन्ही इंजिन 6 स्पीड मॅन्युअल आणि 6 स्पीड ऑटोमॅटिक ट्रान्समिशनमध्ये मिळतील. महिंद्रा थार ही देशातील सर्वांत सुरक्षित ऑफ-रोड एसयूव्हीपैकी एक आहे. या गाडीला GNCAP कार क्रॅश टेस्टमध्ये 4 स्टार सेफ्टी रेटिंग मिळाली आहे. थारची एक्स शोरुम किंमत 11.25 लाख रुपयांपासून सुरू होते.