Gold Price: सोन्याच्या भावात किंचित घसरण, जाणून घ्या आजचा दर
Gold price | सध्या सोनं 45 ते 46 हजार रुपये प्रतितोळा या पातळीवर आहे. ही सोने खरेदीसाठी चांगली संधी असल्याचे मानले जात आहे. पुढील तीन महिन्यांत येथून सोन्याच्या किंमतीत 4-5 हजारांपर्यंत वाढ शक्य आहे.
मुंबई: दसरा आणि दिवाळी या दोन प्रमुख सणांना फारच थोडा अवधी शिल्लक असताना सोमवारी सोन्याच्या दरात किंचित घसरण नोंदवण्यात आली. आज सकाळी बाजारपेठ उघडल्यानंतर सोने 14 रुपयांनी स्वस्त झाले. त्यामुळे 24 कॅरेट सोन्याचा सध्याचा प्रतितोळा दर 46966 रुपये इतका आहे. तर 22 कॅरेट सोन्याचा दर प्रतितोळा 43021 रुपये इतका आहे. तर दुसरीकडे सोमवारी चांदीच्या दरात मात्र तेजी पाहायला मिळाली. चांदीचा दर किलोमागे 295 रुपयांनी वाढून 61375 च्या पातळीवर जाऊन पोहोचला.
मल्टी कमोडिटी एक्स्चेंजवर सोमवारी सोने आणि चांदीच्या दरात घसरण पाहायला मिळाली. सोन्याच्या फ्युचर्स कॉन्ट्रॅक्टसच्या किंमतीत 0.2 टक्क्यांची घसरण होऊन सोने 46,937 रुपये प्रतितोळा या पातळीवर पोहोचले. तर चांदीने 61,737 रुपये प्रति किलोची पातळी गाठली. गुड रिटर्न्स संकेतस्थळाच्या माहितीनुसार, आज 24 कॅरेट सोन्याची किंमत 1 ग्रॅमसाठी 4,694 रुपये, 8 ग्रॅमसाठी 37,552, 10 ग्रॅमसाठी 46,940 आणि 100 ग्रॅमसाठी 4,69,400 रुपये आहे. मुंबईत 22 कॅरेट सोने 45,940 आणि 24 कॅरेट सोने 46,940 रुपये प्रतितोळा या पातळीवर आहे.
गेल्या काही दिवसांपासून सोने आणि चांदीच्या दरात सातत्याने घसरण पाहायला मिळत आहे. सोन्याची किंमत गेल्या अनेक महिन्यांतील निचांकी पातळीवर आहे. त्यामुळे सध्या सोने खरेदीसाठी चांगली संधी असल्याचे मानले जात आहे.
सणासुदीपूर्वी सोनं खरेदी करण्याचा सल्ला
कमोडिटी मार्केट तज्ज्ञांचे म्हणणे आहे की, डॉलर आणि बॉण्ड्सवरील व्याज वाढल्यामुळे सोन्याच्या किंमतीवर दबाव आहे. आगामी काळातही हा दबाव कायम राहील. मात्र, कच्च्या तेलाच्या किंमतीत वाढ झाल्यामुळे जगातील महागाईचा दर (Inflation Rate) वाढेल. अशा स्थितीत सोन्याची मागणी पुन्हा वाढेल आणि किंमतीत वाढ होण्याची शक्यता आहे. ऑक्टोबरच्या तिसऱ्या आठवड्यापासून सोन्याचे भाव वाढण्याचा ट्रेंड पुन्हा सुरू होऊ शकतो. सणासुदीचा हंगाम जवळ आल्याने मागणीही वाढेल आणि किंमती वाढण्याची शक्यता आहे. त्यामुळे सोने खरेदीसाठी सध्याचा काळ अत्यंत योग्य असल्याचे तज्ज्ञांचे म्हणणे आहे.
दिवाळीपर्यंत सोनं 49 हजारांवर
सध्या सोनं 45 ते 46 हजार रुपये प्रतितोळा या पातळीवर आहे. ही सोने खरेदीसाठी चांगली संधी असल्याचे मानले जात आहे. पुढील तीन महिन्यांत येथून सोन्याच्या किंमतीत 4-5 हजारांपर्यंत वाढ शक्य आहे. स्वस्तिक इन्व्हेस्टमेंटचे अभिषेक चौहान यांच्या अंदाजानुसार दिवाळीपर्यंत सोन्याचा भाव 49 हजारापर्यंत पोहोचू शकतो.
पुढील तीन महिन्यांत चांदीचा भाव सध्याच्या पातळीपासून 10 हजारांपर्यंत वर जाऊ शकतो. गेल्या आठवड्यात, मार्च 2022 च्या डिलिव्हरीसाठी चांदीचा बंद भाव 60,967 रुपये प्रति किलो होता.
दुप्पट होऊ शकतो सोन्याचा दर
पुढच्या काही वर्षांत सोन्याच्या किंमती आभाळाला टेकणार असल्याचा असा अंदाज बहुतांश जाणकारांनी वर्तविला आहे. HDFC सिक्युरिटीजच्या तज्ज्ञांच्या मते, पुढच्या 3 ते 5 वर्षांत सोन्याचा दर आताच्या तुलनेत दुप्पट होऊ शकतो. तर पुढच्या 5 वर्षांत 10 ग्रॅम सोन्याचा दर 90 हजारांवर जाऊन पोहोचेल, असे संकेत क्‍वाड्रिगा इग्नियो फंडकडून (Quadriga Igno Fund) देण्यात आले आहेत.
याच काळात आंतरराष्ट्रीय बाजारपेठेत सोन्याचा दर प्रतिऔंस 3000 ते 5000 डॉलर्स इतका असू शकतो. कोरोनाच्या पार्श्वभूमवीर अनेक देशांमध्ये आर्थिक पॅकेजेस (Stimulus Package) दिली जात आहेत. मात्र, त्यामुळे मध्यवर्ती बँकांची अवस्था बिकट होऊ शकते. परिणामी आगामी काळात सोन्याचे दर अक्षरश: गगनाला भिडू शकतात, असे क्‍वाड्रिगा इग्नियो फंडकडून सांगण्यात आले आहे.
संबंधित बातम्या:
Income Tax: तुम्ही घरामध्ये किती सोनं ठेवू शकता? काय आहे नियम; उल्लंघन झाल्यास आयकर विभागाची कारवाई
घरात पडून असलेलं सोनं बँकेत ठेवून पैसे कमावण्याची संधी, जाणून घ्या काय आहे योजना?
आता ‘गुगल पे’ वापरुन खरेदी करा सोनं, जाणून घ्या संपूर्ण प्रक्रिया
