रत्नागिरी अन् सिंधुदुर्गात शिंदे गटाला लवकरच मोठं भगदाड पडणार?, कुणाचा गौप्यस्फोट?

सिंधुदुर्ग, २९ सप्टेंबर २०२३ | शिंदे यांच्या शिवसेनेतील मंत्री उदय सामंत यांचे भाऊ किरण सामंत यांनी त्यांच्या व्हॉटसअप स्टेटसवर ठेवलेल्या एका स्टेटसने राजकीय वर्तुळात अनेक चर्चा सुरू झाल्या आहेत. दरम्यान, किरण सामंत यांच्यासारखे अनेकजण उद्धव ठाकरे यांच्या शिवसेनेत येण्यासाठी सज्ज आहेत. लवकरच रत्नागिरी सिंधुदुर्गमध्ये शिंदे गटाला मोठ भगदाड पडेल, असा गौप्यस्फोट खासदार विनायक राऊत यांनी किरण सामंत यांच्या स्टेटसवर बोलताना केला आहे. उद्योग मंत्री उदय सामंत यांचे भाऊ किरण सामंत यांनी आज मशाल चिन्ह आपल्या स्टेटसवर ठेवलं होतं, यावर प्रतिक्रिया देताना विनायक राऊत यांनी भाष्य केले आहे. ते म्हणाले, लवकरच भाजप शिंदे गटाचं विसर्जन करेल आणि याचीच कुठेतरी चाहुल किरण सामंत यांना लागल्याने त्यांनी हा निर्णय घेतला असावा. लवकरच आपल्याला आणखी मोठे धक्के पाहायला मिळतील, असा गौप्यस्फोट खासदार विनायक राऊत यांनी केला आहे.