एका रात्रीतूनच महिला झाली करोडपती; झोपेमुळे लागली लॉटरी, तुम्हाला हवी अशी कमाईची संधी?

साईश्वरी या महिलेने कमाल केली आहे. इथं लोक रात्रंदिवस काबाडकष्ट करुन पै पै जोडतात. पण या महिलेने अशी कुठलीही तसदी घेतली नाही. तिने एका आयडियातून ही रक्कम कमावली आहे. झोप काढून तिने थोडे थोडके नाही तर 9 लाखांची कमाई केली आहे. तिने एका स्पर्धेत भाग घेऊन ही कमाई केली आहे. या महिलेने झोप काढून कशी कमाई केली याचाच प्रश्न अनेकांना पडला आहे. काय आहे ही स्पर्धा, तुम्हाला पण मिळेल का त्यात सहभागी होण्याची संधी आणि कमाईचा मौका?

झोपण्याच्या स्पर्धेत ठरली विजेती

साईश्वरी या महिलेने झोपण्याची स्पर्धा जिंकली आहे. बंगळूरु येथील स्टार्टअप वेकफिटच्या (Wakefit) स्लीप इंटर्नशीप प्रोग्राममध्ये तीने स्लीप चॅम्पियन हा किताब जिंकला आहे. या कार्यक्रमात तिच्यासह 12 ‘स्लीप इंटर्न’ सहभागी झाल्या होत्या. या स्पर्धेत सुखाची झोप येणे आणि घेणे महत्वाचे आहे. या स्पर्धेत भाग घेणाऱ्या स्पर्धकांना प्रत्येक रात्री कमीत कमी 8 ते 9 तासांची झोप घेणे बंधनकारक आहे. तसेच निद्रा तज्ज्ञाच्या मार्गदर्शनाखाली दिवसभर झोपेसंदर्भातील इतर क्रिया करणे आवश्यक आहे. या कार्यक्रमात सहभागी स्पर्धकांवर लक्ष ठेवण्यात येते. तसेच तो खरंच झोपला की नाही यासाठी तंत्रज्ञानाची मदत घेण्यात येते.

निद्रा सल्लागाराच्या नेतृत्वात कार्यशाळा

निद्रा सल्लागाराच्या नेतृत्वात स्पर्धकाला झोपेचे प्रशिक्षण देण्यात येते. यामध्ये स्पर्धकाला दिवसा 20 मिनिटांची डुलकी घ्याव लागते. प्रत्येक स्पर्धकावर येथे लक्ष ठेवण्यात येते. त्याला नरम आणि मुलायम उशी आणि स्लीप ट्रॅकर देण्यात येतो. स्पर्धकाची झोपण्याची सवय सुधारावी आणि स्लीप चॅम्पियन हा किताब नावावर असावा यासाठी त्याची नियमित कार्यशाळा घेण्यात येते.

10 लाख लोकांनी केली नोंदणी

या इंटर्नशिप प्रोगाममध्ये 10 लाखांहून लोकांनी नोंदणी केली. या स्पर्धेचे हे तिसरे पर्व आहे. त्यासाठी देशभरातून जोरदार प्रतिसाद मिळाला. या झोपण्याच्या स्पर्धेसाठी दहा लाखांहून अधिक लोकांनी नाव नोंदणी केली होती. कंपनीच्या संकेतस्थळावर त्याची माहिती मिळू शकते. या कार्यक्रमात निद्राधीश हा किताब अर्थात साईश्वरीने पटकावला. या स्पर्धेतील 51 स्पर्धकांना रोजगार पण मिळाला.