Vasai Youth Death : औषध लावून केस उन्हात सुकवत होता, टेरेसच्या कठड्यावरुन तोल गेला अन्…
भुवन दररोज केसांना औषध लावून टेरेसवर सुकवण्यासाठी जायचा. नेहमीप्रमाणे आज संध्याकाळी साडे चार वाजण्याच्या सुमारास भुवन केसाला औषध लावून टेरेसच्या कठड्यावर बसला होता. यावेळी अचानक भुवनचा तोल गेला आणि तो खाली कोसळला.
वसई : टेरेसवर केस सुकवत बसला असताना तो जाऊन खाली पडल्याने एका 22 वर्षीय तरुणाचा मृत्यू झाल्याची घटना वसईत घडली आहे. भुवन कनौजिया असे मयत तरुणाचे नाव आहे. याप्रकरणी माणिकपूर पोलीस ठाण्यात अपघाती मृत्यूची नोंद करण्यात आली आहे. घटनेची माहिती मिळताच माणिकपूर पोलिसांनी घटनास्थळी धाव घेत मृतदेह ताब्यात घेतला. पोलिसांनी मृतदेह शवविच्छेदनासाठी रुग्णालयात पाठवला. वसईच्या विशाल नगर परिसरात येथील रॉयल शाळेच्या आवारातील इमारतीमध्ये ही दुर्दैवी घटना घडली आहे.
भुवनला केसांची काहीतररी समस्या होती
भुवनचे वडिल याच रॉयल शाळेत बस चालक म्हणून काम करतात. भुवनच्या केसांची काहीतरी समस्या होती. यासाठी त्याचे औषधोपचार सुरु होते. डॉक्टरांनी केसाला लावायला औषध दिले होते.
केसांना औषध लावून टेरेसवर सुकवत होता
भुवन दररोज केसांना औषध लावून टेरेसवर सुकवण्यासाठी जायचा. नेहमीप्रमाणे आज संध्याकाळी साडे चार वाजण्याच्या सुमारास भुवन केसाला औषध लावून टेरेसच्या कठड्यावर बसला होता. यावेळी अचानक भुवनचा तोल गेला आणि तो खाली कोसळला.
दुर्घटनेत भुवनचा जागीच मृत्यू
या दुर्घटनेत भुवनचा जागीच मृत्यू झाला. वसईतील जी. जी कॉलेजमध्ये बीकॉमच्या शेवटच्या वर्षाला शिकत होता. भुवनला फिट येण्याचा त्रास होता, अशी प्राथमिक माहिती पोलिसांनी दिली.
माणिकपूर पोलिसांकडून तपास सुरु
घटनेची माहिती माणिकपूर पोलिसांनी देण्यात आली. पोलिसांनी घटनास्थळी धाव घेत मृतदेह शवविच्छेदनासाठी रुग्णालयात पाठवला. या घटनेमुळे कनौजिया कुटुंबावर दुःखाचा डोंगर कोसळला आहे. पोलीस घटनेचा अधिक तपास करत आहेत.
घटनास्थळी माणिकपूर पोलीस ठाण्याचे वरिष्ठ पोलीस निरीक्षक संपतराव पाटील यांनी भेट देत पाहणी केली. पोलिसांनी आकस्मिक नोंद केली आहे.
