Video : याला म्हणतात ‘आ बैल मुझे मार’! औरंगाबादेच्या फुलंब्रीचा व्हिडीओ व्हायरल

औरंगाबाद : कोरोनानंतर मोठ्या जल्लोषात, फटाक्यांच्या आतषबाजीत यंदा दिवाळी साजरी (Diwali Celebration) होतेय. दोन वर्षांची कसर काढण्यासाठी सगळ्यांनीच कंबर कसली आहे. दिव्यांची रोषणाई आहे. रांगोळीत रंगांची उधळण आहे. फटाके फोडण्याच्या (Fire Crackers) उत्साहाला काही मोजमापच नाही. खरंतर सर्वसामान्यपणे फटाके फोडू नका, असं आवाहन केलं जातं. प्रदूषण टाळण्यासाठी फटाके न फोडण्यासाठी जनजागृती केली जाते. पण तरिही दरवर्षी दिवाळीला फटाके फुटतातच. सर्वसामान्य माणसं फटाके फोडून दिवाळी साजरी करतात. पण औरंगाबादचा (Aurangabad News) पॅटर्नच वेगळाय. औरंगाबादच्या फुलंब्री तालुक्यातील एके ठिकाणी चक्क एकमेकांवर फटाके फोडण्यात आलेत. याचा व्हिडीओही आता व्हायरल झालाय.

औरंगाबाद जिल्ह्यातील फुलंब्री तालुक्यातील वडोद बाजार पोलीस ठाण्याच्या हद्दीतील व्हिडीओ समोर आलाय. या ठिकाणी तरुणांचे तीन गट एकमेकांवर फटाके फोडत होते. फटाके फोडण्याचा हा थरार मोबाईल कॅमेऱ्यातही कैद करण्यात आला.

पाहा व्हिडीओ :

यांचा पॅटर्नच वेगळाय! सामान्य लोकं फटाके फोडतात, औरंगाबादच्या फुलंब्रीत एकमेकांच्या अंगावर फटाके फोडतात.. (व्हिडीओ – दत्ता कानवटे, प्रतिनिधी, टीव्ही 9 मराठी) #Diwali pic.twitter.com/HHiyQvwXNR

— Siddhesh Sawant (@ssidsawant) October 25, 2022

यावेळी तरुणांचे तीन गट एकमेकांवर फटाके पेटवून सोडून देत होते. यातून दुसरा गट फटाके चुकवण्यासाठी सैरावैरा पळत होता. तर तिसरा गट प्रतिहल्ला म्हणून पहिल्या गटावर पुन्हा फटाके पेटवून सोडत होता.

एकमेकांच्या अंगावर फटाके फोडण्याचा हा जीवघेणा प्रकार थरकाप उडवणारा आहे. अनेकदा फटाके फुटण्याच्या नुसत्या आवाजाने लोकांना धडकी भरते. इथे तर जळते फटके, रॉकेट एकमेकांच्या अंगावर सोडले जात असल्याचं दिसून आलं.

हा प्रकार पाहून तरुणांना जीवाची पर्वाच नाहीये की काय, असा प्रश्नही उपस्थित होतोय. एकदा फटाका चुकून अंगावर फुटला तर शरीर भाजू शकतं. जखम होऊ शकते.

दिवाळी साजरी करण्याच्या निमित्ताने असा जीवघेणा खेळ करणं कितपत योग्य, असा सवालही या व्हिडीओमुळे उपस्थित झालाय. सध्या या व्हायरल व्हिडीओवरुन सोशल मीडियात चित्र विचित्र प्रतिक्रिया पाहायला मिळाल्यात.