आपसातील वाद टोकाला गेला, मग लस्सी विक्रेत्याला भररस्त्यात भोसकला !

भंडारा : आपसातील वादातून लस्सी विक्रेता युवकावर धारदार शस्त्रानं प्राणघातक हल्ला केल्याची धक्कादायक घटना भंडाऱ्यात उघडकीस आली आहे. या हल्ल्यात तरुणाचा जागीच मृत्यू झाला. भंडारा शहरातील गांधी चौकात काल रात्रीच्या सुमारास ही घटना घडली. अमन नांदुरकर असे मृत्यू झालेल्या तरुणाचे नाव आहे. हत्येनंतर नागरिकांनी आरोपीला पकडून पोलिसांच्या ताब्यात दिले. या घटनेमुळे परिसरात एकच खळबळ उडाली आहे. घटनेची माहिती मिळताच पोलिसांनी घटनास्थळी धाव घेत मृतदेह ताब्यात घेऊन शवविच्छेदनासाठी रुग्णालयात पाठवला. घटनास्थळाचा पंचनामा करत पुढील तपास सुरु केला आहे.

घटनेनंतर नागरिकांकडून आरोपींना चोप

अमन नांदुरकर हा तरुण लस्सी विक्रीचा व्यवसाय करतो. काल रात्रीच्या सुमारास तीन जण तेथे आले. यानंतर आपसातील वादातून त्यांनी अमनवर हल्ला केला. या हल्ल्यात गंभीर जखमी झालेल्या अमनचा जागीच मृत्यू झाला. या घटनेनंतर परिसरात उपस्थित नागरिकांनी हल्लेखोरांचा पाठलाग करून त्यांना चांगलाच चोप दिला. नागरिकांच्या मारहाणीत तीन आरोपी जण जखमी असून, त्यातील आरोपी अभिषेक साठवणे हा गंभीर जखमी झाला आहे. जखमी अभिषेकला पुढील उपचारासाठी नागपूरला हलवले आहे.

वादाचे नक्की कारण अनभिज्ञ

घटनेनंतर मृतकाच्या मित्रमंडळींनी जिल्हा सामान्य रग्णालयात धाव घेत तिथे उपचारासाठी दाखल आरोपींना पकडून मारहाण केली. यामुळं शहरात तणावाचे वातावरण निर्माण झाले आहे. पोलिसांसह राज्य राखीव दलाचा तगडा बंदोबस्त तैनात करण्यात आला आहे. दरम्यान, पीडित आणि आरोपी यांच्यात नेमका काय वाद होता? याबाबत अद्याप कळू शकले नाही. पोलीस याबाबत अधिक तपास करत आहेत.