लातूरमध्ये माणुसकीला काळिमा ! महिलेच्या असहायतेचा गैरफायदा घेत शेजाऱ्यानेच केला अत्याचार
पीडिता ही अंध आणि कर्णबधिर असल्याचा गैरफायदा घेऊन आरोपीने पिडीतेला घराजवळच्या शेतात ओढत नेले आणि तिथे तिच्यावर अत्याचार केले.
लातूर : अंध आणि मूकबधिर असलेल्या एका महिलेला ऊसाच्या फडात ओढत नेत तिच्यावर अत्याचार (Assault) केल्याची घटना लातूर जिल्ह्यातल्या गातेगावमध्ये घडली आहे. पिडीत महिलेच्या शेजारी (Neighbour)च राहणाऱ्या आरोपीने हे कृत्य केले आहे. घराजवळ असलेल्या ऊसा (Sugarcane)त ओढत नेऊन अत्याचार करण्यात आला. याप्रकरणी गातेगाव पोलिसात घटनेची नोंद करण्यात आली आहे. सुरुवातीला तक्रार नोंदवायला टाळाटाळ करणाऱ्या पोलीस कर्मचाऱ्यांवर कारवाई करा, अशी मागणी पीडितेच्या नातेवाईकांनी केली आहे.
आरोपी नेहमी पीडितेची छेडछाड काढायचा
गातेगाव पोलिसांच्या हद्दीत असलेल्या गातेगाव या गावात दोन अंध-मूकबधिर महिला आपल्या भावाच्या कुटुंबासोबत राहतात. पीडिता आणि आरोपी हे शेजारी शेजारी आहेत. पीडितेच्या असहाय्यतेचा गैरफायदा घेत आरोपी बाळासाहेब साबळे हा गेल्या काही दिवसांपासून पीडिता आणि तिच्या बहिणीसोबत घरी येऊन छेडछाड करायचा.
लोकांना येताना पाहताच आरोपीने पळ काढला
पीडिता ही अंध आणि कर्णबधिर असल्याचा गैरफायदा घेऊन आरोपीने पिडीतेला घराजवळच्या शेतात ओढत नेले आणि तिथे तिच्यावर अत्याचार केले. पिडीतेचा आरडा-ओरडा ऐकून काहींनी घटनास्थळाकडे धाव घेतली असता आरोपीने पळ काढला.
पोलिसांनी गुन्हा दाखल करण्यास टाळाटाळ केल्याचा नातेवाईकांचा आरोप
पिडीता आणि तिचे नातेवाईक पोलीस ठाण्यात गेल्यानंतर गुन्हा दाखल करायला कर्मचाऱ्यांनी टाळाटाळ केली. त्यामुळे गुन्हा दाखल करायला वेळ लागला असा नातेवाईक आणि सामाजिक कार्यकर्त्यांचा आरोप आहे. (Blind and mute deaf woman molested by accused neighbour in Latur)
