तो गाडी चालवायचा, ती मागे बसायची; बंटी-बबलीचा कारनामा सीसीटीव्हीत कैद
मॉर्निंग वॉकला जाणाऱ्या महिलांना टार्गेट करत बंटी बबलीने परिसरात धुमाकूळ घातला होता. मात्र ही दुकली सीसीटीव्हीत कैद झाली अन् पोलिसांच्या तावडीत सापडली.
नागपूर : मॉर्निंग वॉकला जाणाऱ्या महिलांना टार्गेट करुन चैन स्नॅचिंग करणाऱ्या बंटी बबलीला नागपूर पोलिसांनी अखेर बेड्या ठोकल्या आहेत. अल्पवयीन आरोपी गाडी चालवायचा आणि युवती मागे बसून चालत्या महिलांचे दागिने हिसकवायची. दोघेही सीसीटीव्ही कॅमेऱ्यात कैद झाले होते. सीसीटीव्ही फुटेजच्या आधारे पोलिसांनी दोघा आरोपींना अटक केली आहे. आरोपींनी आतापर्यंत चार गुन्ह्यांची कबुली दिली आहे. पोलीस आरोपींची अधिक चौकशी करत आहेत. आरोपींनी आणखी किती गुन्हे केलेत याचा पोलीस तपास करत आहेत.
बंटी-बबलीने परिसरात घातला होता धुमाकूळ
आपल्या अल्पवयीन मित्रासोबत मिळून एक तरुणी नागपूरच्या तहसील आणि गणेशपेठ पोलीस स्टेशन हद्दीत चैन स्नॅचिंग करत होती. या बंटी-बबलीच्या जोडीने परिसरात धुमाकूळ घातला होता. ही बंटी बबलीची जोडी मॉर्निंग वॉकला निघणाऱ्या महिलांना टार्गेट करायचे. रस्त्यात एकटी महिला दिसली की, तिच्या जवळून गाडी घेऊन जायचे. अल्पवयीन मुलगा गाडी चालवायचा आणि ऋतुजा नावाची तरुणी महिलेच्या गळ्यातील सोनसाखळी घेऊन सुसाट वेगाने पळायचे.
सीसीटीव्हीच्या आधारे आरोपी अटक
या बंटी बबलीच्या जोडीने गणेशपेठ आणि तहसील पोलीस स्टेशनच्या हद्दीमध्ये अशा प्रकारच्या चार घटना केल्याचं उघड झालं. मात्र तहसील पोलीस स्टेशन हद्दीत एका महिलेची सोनसाखळी चोरताना हे बंटी बबली सीसीटीव्हीमध्ये कैद झाले. मग पोलिसांनी यांचा शोध घेत या दोघांनाही ताब्यात घेतले. पोलिसांनी आरोपींकडून चोरलेल्या सगळ्या वस्तू हस्तगत केल्या आहेत. अल्पवयीन मुलाचा फायदा घेत ही युती अशा प्रकारे मॉर्निंग वॉकच्या वेळेचा फायदा घेत चोऱ्या करायची.
