अजब अरेरावी ! एअरपोर्टवर लेट पोहोचून जोडप्याचा तमाशा, महिला कर्मचाऱ्यालाही लगावली कानाखाली !

लखनऊ | 3 ऑगस्ट 2023 : स्वत:ची चूक मान्य न करता इतरांना त्रास देण्याची, अरेरावी करण्याची काही लोकांची वृत्ती असते. असंच एक प्रकरण लखनऊ एअरपोर्टवरही (airport) घडलं आहे. येथील चौधरी चरण सिंह इंटरनॅशनल एअरपोर्टवर एका जोडप्याने चांगलाच गोंधळ घातल्याचे समोर आले आहे. हे जोडपं तिथे स्वत:च खूप उशीरा पोहोचलं, तेव्हा एअरपोर्टवरील स्टाफनी (airport staff) त्यांना बोर्डिंगची परवानगी दिली नाही.

त्यामुळे भडकलेल्या प्रवाशांनी त्यांच्याशी गैरवर्तन केले. त्यांनी आधी एका महिला कर्मचाऱ्याला शिवीगाळ केली एवढंच नव्हे तर त्यांनी तिच्या कानाखालीही मारल्याचे समोर आले आहे. या संपूर्ण प्रकरणाची तक्रार पोलिसांत देण्यात आली आहे. मात्र ते जोडपं पुढल्या विमानाचे तिकीट बूक करून पुढे निघून गेले.

पोलिसांकडून मिळालेल्या माहितीनुसार, मुंबईला जाणारे प्रवासी अक्रम खान व त्यांची पत्नी यांनी आपल्याला शिवीगाळ व मारहाण केली असा आरोप आकाशा एअरलाइन्सच्या काऊंटरवर तैनात असलेल्या कस्टमर केअर एक्झिक्युटिव्ह निमिषा हिने लावला आहे. तिच्या सांगण्यानुसार, अक्रम व त्यांची पत्नी हे एअरपोर्टवर १५ मिनिटे उशीरा पोहोचले होते. त्यांनी निमिषाकडे आत जाण्याची परवानगी मागितली असता, फ्लाईट टेक-ऑफसाठी तयार असल्याचे तिने त्यांना सांगितले.

रागात लगावली कानाखाली

त्यानंतरही त्यांनी तिच्याकडे बोर्डिंगची परवानगी मागितली असता निमिषाने असमर्थता दर्शवत काहीच मदत करू शकत नसल्याचे स्पष्ट केले. यामुळे अक्रम व त्यांची पत्नी संतापले व त्यांनी निमिषाला (प्रथम) शिवीगाळ करण्यास सुरूवात केली. ते एवढ्यावरच थांबले नाहीत, तर रागाच्या भरात त्यांनी तिच्या कानाखालीही लगावली. यानंतर एअरलाइन्सचे इतर कर्मचारी घटनास्थळी पोहोचले तसचे सीआयएसएफलाही या घटनेची माहिती देण्यात आली.

मुंबईला निघून गेलं जोडपं

या संपूर्ण प्रकरणाची तक्रार सरोजिनी नगर पोलिस स्थानकात नोंदवण्यात आली असून पोलिसांनी आरोपीविरोधात तपास सुरू केला आहे. पोलिसांनी दिलेल्या माहितीनुसार, या संपूर्ण घटनेनंतर आरोपी जोडप्याने लगेच दुसऱ्या फ्लाईटची तिकीटे बूक केली व ते पुढे निघून गेले. याप्रकरणी लौकरच कारवाई करण्यात येईल, असे आश्वासन पोलिसांनी दिले आहे.