कल्याणमध्ये पार्किंगवरून दोन गटामध्ये राडा, घटना सीसीटीव्हीत कैद
निवासी सोसायटीच्या शेजारीच हॉटेल असल्याने हॉटेलमध्ये येणाऱ्या ग्राहकांच्या गाड्या सोसायटीच्या बाहेरच उभ्या रहायच्या. यामुळे सोसायटीतील लोकांना त्रास होत होता.
कल्याण : वाहन पार्किंगवरुन झालेल्या वादातून दोन गटात हाणामारी झाल्याची घटना कल्याणमध्ये घडली आहे. सोसायटीबाहेर असलेल्या हॉटेलमध्ये आलेले ग्राहक सोसायटीच्या गेटसमोर वाहन पार्क करत असल्याने सोसायटीच्या वॉचमन हटकले. यावरुन हॉटेल कर्मचारी आणि सोसायटी वॉचमनमध्ये राडा झाला. ही सर्व घटना सीसीटीव्हीत कैद झाली आहे. याप्रकरणी कल्याण खडकपाडा पोलिसांनी दोन्ही गटाच्या विरोधात गुन्हा दाखल करत तपास सुरू केला आहे. खडकपाडा पोलीस सीसीटीव्हीच्या मदतीने तपास करत आहेत. या घटनेमुळे परिसरात एकच खळबळ माजली आहे.
वॉचमन आणि हॉटेल कर्मचाऱ्यांमध्ये राडा
कल्याण पश्चिमेतील खडकपाडा परिसरात मिंगयांग हे हॉटेल आहे. या हॉटेलच्या बाजूला दोन मोठ्या सोसायट्या आहेत. या हॉटेलमध्ये येणारे ग्राहक आपली गाडी सोसायटीसमोर लावत असतात. सोसायटीच्या लोकांना याचा त्रास होत असल्याने सोसायटीचा वॉचमन नवीन थापा याचा हॉटेल कर्मचाऱ्यांसोबत गाडी पार्किंग करण्यावरून नेहमी वाद व्हायचा.
खडकपाडा पोलिसात परस्परविरोधी गुन्हा दाखल
हा वाद इतका वाढला की, बुधवारी संध्याकाळी हॉटेलमध्ये काम करणाऱ्या 10 ते 12 कर्मचाऱ्यांनी वॉचमन नवीन थापा याला मारहाण करायला सुरुवात केली. या दरम्यान नवीन थापा याने देखील हॉटेलच्या एका मारहाण केली. मारहाणीची घटना सीसीटीव्हीत कैद झाली आहे. या प्रकरणी पोलिसांनी दोन्ही गटाच्या विरोधात गुन्हा दाखल केला आहे. सीसीटीव्हीच्या सहाय्याने खडकपाडा पोलीस पुढील तपास सुरू केला आहे.
