Buldhana Crime : पतीनेच महिला पोलीस कर्मचारीसह मुलीला संपवले, धक्कादायक घटनेने बुलढाणा हादरले !
अज्ञात व्यक्तीचा मृतदेह सापडल्यानंतर पोलीस त्याच्या कुटुंबाच्या शोधात त्याच्या घरी पोहचले. घरी पोहचताच जे दृश्य दिसले ते पाहून पोलीस हैराण झाले.
बुलढाणा / 21 ऑगस्ट 2023 : बुलढाण्यात धक्कादायक घटना उघडकीस आली आहे. अज्ञात कारणातून एका व्यक्तीने आपल्या पोलीस कर्मचारी असलेल्या पत्नीसह चार वर्षाच्या मुलीची हत्या केल्याची घटना चिखली येथे घडली. यानंतर पतीनेही स्वतःचे जीवन संपवले. पोलिसांनी तिघांचेही मृतदेह ताब्यात घेत शवविच्छेदनासाठी रुग्णालयात पाठवले. किशोर कुटे आणि वर्षा कुटे अशी मयत जोडप्याची नावे आहेत. याप्रकरणी चिखली पोलिसात नोंद करण्यात आली असून, पोलीस प्रकरणाचा तपास करत आहेत. तपासानंतरच हत्या आणि आत्महत्येचे कारण स्पष्ट होईल. मात्र या घटनेमुळे परिसरात खळबळ उडाली आहे.
काय घडलं नेमकं?
चिखली ते खामगाव रोडवर असलेल्या पंचमुखी महादेव मंदिराजवळ कुटे कुटुंबीय भाड्याच्या घरात राहत होते. किशोर कुटे शेती करायचा. पत्नी वर्षा ही पोलीस दलात कार्यरत असून, चिखली पोलीस ठाण्यात कार्यरत होती. या जोडप्याला दोन मुली आहेत. पतीने पत्नी आणि छोट्या मुलीची आधी हत्या केली. त्यानंतर पती घरापासून 25 ते 30 किमी अंतरावर पतीने जीवन संपवले.
‘अशी’ उघडकीस आली घटना?
पतीचा मृतदेह सापडल्यानंतर पोलिसांनी त्याच्या कुटुंबीयांचा शोध घेतला. जेव्हा पोलीस त्याच्या घरी पोहचले तेव्हा घरात पत्नी आणि मुलीचा मतदेह आढळल्यानंतर सर्व घटना उघडकीस आली. मोठी शाळेत गेली होती, यामुळे ती वाचली आहे. यानंतर पोलिसांनी दोन्ही मृतदेह ताब्यात घेत शवविच्छेदनासाठी रुग्णालयात पाठवले. पती-पत्नीमध्ये नेमकं काय घडलं याबाबत अद्याप कळू शकले नाही. पोलीस प्रकरणाचा तपास करत आहेत. तपासानंतरच हत्या आणि आत्महत्येचे कारण स्पष्ट होईल.
