लग्नात डीजेवर नाचण्यावरुन वाद झाला, वरात संपताच तरुणाचा काटा काढला !
लग्नाची वरात निघाली होती. दोन्ही कुटुंबात आनंदाचे वातावरण होते. नवरदेवाकडील मंडळी नववधूचे स्वागत करण्यात मग्न होती. मात्र वरात संपताच भयंकर घटना समोर आली.
सिवनी : मध्य प्रदेशातील सिवनी येथे लग्नाच्या वरातीत नाचण्यावरुन झालेल्या वादातून एका तरुणाची हत्या केल्याची धक्कादाक घटना उघडकीस आली आहे. या घटनेत पाच तरुणांचा सहभाग असल्याची माहिती नातेवाईकांनी दिली आहे. त्यानुसार आरोपीना अटक करण्यासाठी पोलीस प्रयत्न करत आहेत. कुटुंबीय लवकरात लवकर आरोपींना पकडून कठोर शिक्षा देण्याची मागणी करत आहेत. वरातीत नाचण्यावरून चांगलाच वाद झाला. वाद इतका गेला की हाणामारी झाली. याप्रकरणी झरी पोलीस ठाण्यात हत्येचा गुन्हा दाखल करण्यात आला आहे. झरी पोलीस ठाण्याच्या हद्दीतील बोरीखुर्द गावात ही घटना घडली.
वरातीत वाद झाला, मग वरातीनंतर काटा काढला
बारघाट पोलीस ठाणे हद्दीतील मानेगाव येथून साहू समाजाची विवाह मिरवणूक बोरीखुर्द गावात आली होती. डीजेमध्ये नाचत असताना वरातीतील दोन तरुणांमध्ये वाद झाला. वरात संपल्यानंतर दोघांमध्ये जोरदार हाणामारी झाली. यात योगेश आगासे हा तरुण गंभीर जखमी झाला. त्याला तात्काळ नजीकच्या रुग्णालयात उपचारासाठी नेण्यात आले. प्राथमिक उपचारानंतर त्याला नागपूरला रेफर करण्यात आले. मात्र योगेश आगासे याचा रुग्णालयात उपचारादरम्यान मृत्यू झाला.
दोन संशयितांना ताब्यात घेतले
घटनेची माहिती मिळताच पोलिसांनी तात्काळ तपास सुरु केला. दोन तरुणांना संशयाच्या आधारे ताब्यात घेतले आहे. तर अन्य फरार आरोपींचा शोध सुरू आहे. पोलिसांनी घटनेचा पंचनामा आणि इतर कारवाईनंतर मृतदेह त्याच्या कुटुंबीयांच्या ताब्यात दिला. योगेशच्या मृत्यूमुले त्याच्या कुटुंबावर दुःखाचा डोंगर कोसळला आहे.
