भावाचा अपघात झालाय सांगत बहिणीला बोलावले, मग तरुणीसोबत केले ‘हे’ धक्कादायक कृत्य
पीडितेचा जबाब नोंदवून तिची वैद्यकीय तपासणी करण्यात येत असून, त्यानंतर आरोपींवर कायदेशीर कारवाई केली जाईल, असे पोलिसांनी सांगितले.
भिलवाडा : भावाचा अपघात झाल्याचे सांगत तरुणीला बोलावून तिच्यावर अत्याचार करुन तिला इमारतीवरुन खाली फेकल्याची धक्कादायक घटना राजस्थानमधील भिलवाडा येथे घडली आहे. या घटनेत मुलगी जखमी झाली आहे. याप्रकरणी सुभाष नगर पोलीस ठाण्यात नोंद करण्यात आली असून, पोलिसांनी आरोपी तरुणाला ताब्यात घेतले आहे. इरफान असे आरोपी तरुणाचे नाव आहे. विशेष म्हणजे आरोपी आणि तरुणी एकमेकांना ओळखतही नाहीत.
सुभाष नगर पोलीस ठाण्यात गुन्हा दाखल केल्यानंतर इरफानला ताब्यात घेण्यात आले आहे. पीडितेचा जबाब नोंदवून तिची वैद्यकीय तपासणी करण्यात येत असून, त्यानंतर आरोपींवर कायदेशीर कारवाई केली जाईल, असे पोलिसांनी सांगितले.
बाजारात जात असताना तरुणीला अडवले
पीडित तरुणी बाजारात जात असतानाच इरफानने तिला तिच्या भावाचा अपघात झाल्याचे सांगत तिला स्कुटीवर बसवले. त्यानंतर स्कुटीवरुन तिला सुभाष नगर वॉटर प्लांटमध्ये नेले. तेथे गेल्यानंतर तरुणीने भाऊ कुठे आहे विचारले असता तरुणाने रुममध्ये असल्याचे सांगितले.
आरडाओरडा केल्यानंतर तरुणीला खाली फेकले
त्यानंतर रुममध्ये नेऊन तिच्यावर बलात्कार केला. तरुणीने आरडाओरडा करण्यास सुरवात केल्याने लोक जमा झाले. लोक जमा होताच आरोपीने तरुणीला खिडकीतून दुसऱ्या मजल्यावरुन खाली फेकले. यात मुलीच्या हाताला आणि कमरेला जखमा झाल्या आहेत.
