Nagpur Crime : OLX वर बाईक विकणं तिला पडलं महागात, बसला हजारोंचा फटका

सुनील ढगे, टीव्ही9 मराठी प्रतिनिधी, नागपूर | 3 नोव्हेंबर 2023 : आजकाल ऑनलाइनचा जमाना आहे. साखरेपासून सुईपर्यंत ते मोबाईलपासून बाईकपर्यंत सगळ्या गोष्टी ऑनलाइन अव्हेलेबल असते. त्यामुळे खरेदीचं कामही खूप सोपं होतं. ऑनलाइन प्लॅटफॉर्मवर जशी एखादी गोष्ट विकत घेता येते तशीच ती विकताही येते. घरातील एखादी जुनी झालेली पण चांगल्या अवस्थेतील वस्तू विकण्यासाठी ऑनलाइन ऑप्शन्स आहेत.

वेगवेगळ्या साईटवर घरातील सामान विकू शकतो. त्यापैकीच एक साईट म्हणजे OLX. घरातील कोणतही सामान तुम्ही त्यावर विकू शकता. पण योग्य ती खबरदारीही घेतली पाहिजे नाहीतर मोठं नुकसान होऊ शकतं. अशीच एक घटना नागपूरमध्येही घडली, जिथे ऑनलाइन माध्यमातून बाईक विकणं एका तरीणाला फारच महागात पडल. तिने OLX वर बाईक विकण्यासाठी जाहिरात तर दिली पण पहिला ग्राहक येताच तिला मोठा फटका बसला. बाईकची ट्रायल घेण्याच्या बहाण्याने तो तरूण बाईक घेऊनचा फरार झाला.

असा घातला गंडा

मिळालेल्या माहितीनुसार, नागपूरच्या नंदनवन पोलीस स्टेशन हद्दीत चोरीचा हा गुन्हा घडला. पारूल सोनी या तरूणीने (OLX) ‘ओएलएक्स’ या संकेतस्थळावर दुचाकी विकण्याची जाहिरात अपलोड केली होती. ती जाहिरात पाहून सचिन नावाच्या इसमाने तिला फोन केला आणि बाईक पाहण्याची इच्छा व्यक्त केली. त्याने पारुल सोनी हिला गाडी पाण्याच्या बहाण्याने केडीके कॉलेजजवळ बोलावले.

दोघेही तेथे पोहोचल्यानंतर सचिनने पारुलला बाईकची ट्रायल घेण्याबद्दल विचारले. तिने होकार दिल्यानंतर तो बाईकवर बसला आणि पुढे गेला. मात्र बराच वेळ झाला तरी तो परत आलाच नाही. अखेर तो बाईक घेऊन फरार झाल्याचे आणि आपली फसवणूक झाल्याचे पारुल हिच्या लक्षात आले. तिने तातडीने नंदनवन पोलीस ठाणे गाठून सर्व प्रकार कथन करत यासंदर्भात तक्रार नोंदवली. बाईक चोरीच्या या घटनेसंदर्भात पोलिसांनी गुन्हा दाखल केला असून आरोपीचा कसून शोध घेण्यात येत आहे. दरम्यान कोण कोणाची फसवणूक कशा प्रकारे करेल याचा काही नेम नाही त्यामुळे कुठलाही व्यवहार करताना सावध राहून करणे गरजेचं आहे , असा सल्ला देत पोलिसांनी सर्वांना सावध आणि सतर्क राहण्याचे आवाहन केले.