कांबळे दुहेरी हत्याकांड प्रकरण, जिल्हा सत्र न्यायालयाचा मोठा निर्णय

नागपूर : दिघोरी परिसरात पत्रकार रविकांत कांबळे कुटुंबासह राहतात. या कुटुंबात आई-वडील, रविकांत यांची पत्नी आणि दोन चिमुकल्या जुडवा मुली राशी आणि खुशी राहत होते. 17 फेब्रुवारी 2018 रोजी संध्याकाळपासून आजी उषा कांबळे आणि दीड वर्षीय चिमुकली राशी कांबळे या बेपत्ता झाल्या होत्या. आई आणि मुलगी बेपत्ता झाल्यावर रविकांत कांबळे यांनी हुडकेश्वर पोलीस स्टेशनमध्ये तक्रार नोंदवली होती. पोलिसांनी तपासात आजी आणि नात घराशेजारील एका किराणा दुकानात शेवटचे दिसल्याची माहिती पोलिसांना मिळाली.

दोघांच्या हत्येची कबुली

हे किराणा दुकान शाहू यांचे होते. संशयाच्या आधारावर पोलिसांनी किराणा दुकानाचे मालक गणेश शाहू यांना ताब्यात घेऊन विचारपूस केली. सुरुवातीला गणेश शाहू पोलिसांची दिशाभूल करीत होता. मात्र पोलिसी खाक्या दाखवताच त्याने दोघांचीही हत्या केल्याचे कबूल केले.

गणेश शाहू यांने 56 वर्षीय उषा कांबळे आणि दीड वर्षीय राशी कांबळेचा खून केल्याची कबुली दिली. या हत्याकांडाने त्यावेळी खळबळ उडवून दिली होती. ज्यानंतर सरकारी वकील म्हणून उज्वल निकम यांनी या खटल्याचे कामकाज पाहिले.

मृतदेह पोत्यात भरले

उषा कांबळे आणि आरोपी गणेश शाहू यांचा भिशीच्या पैशावरून बऱ्याच दिवसापासून वाद सुरू होता. या वादातूनच हे हत्याकांड झाल्याचे तपासात निष्पन्न झाले. धारदार शस्त्राने दोघांचीही हत्या करण्यात आली होती. रात्रीच्या अंधारात दोघांचे मृतदेह पोत्यात ठेवून चारचाकी वाहनाने उमरेड रोडवरच्या निर्जन नाल्यात फेकून देण्यात आले होते. अनेक प्रकरणात दुसऱ्यासाठी लढणाऱ्या पत्रकाराला आजच्या न्यायालयाच्या निर्णयानंतर स्वतः न्याय मिळाला एवढे खरे.