Nagpur Crime : दोन दिवसापूर्वी शाब्दिक बाचाबाची झाली, वादाच्या रागातून पतीने पत्नीला थेट…
कोराडी परिसरात घरगुती वादातून पतीने पत्नीला संपवल्याची घटना ताजी असतानाच आता हुडकेश्वर परिसरात अशीच एक घटना उघडकीस आली आहे. या घटनेमुळे एकच खळबळ माजली आहे.
नागपूर / 15 ऑगस्ट 2023 : क्षुल्लक कारणातून पतीने पत्नीची हत्या केल्याची धक्कादायक घटना नागपुरात घडली आहे. नयर शपी खान असे मयत पत्नीचे नाव आहे, तर समीर अन्सारी असे आरोपी पतीचे नाव आहे. याप्रकरणी हुडकेश्वर पोलीस ठाण्यात हत्येचा गुन्हा दाखल करण्यात आला आहे. पत्नीची हत्या केल्यानंतर पती स्वतःहून पोलीस ठाण्यात हजर झाला. पोलिसांनी आरोपीला अटक केली आहे. या घटनेमुळे एकच खळबळ उडाली आहे. कोराडी परिसरात पतीने पत्नीला संपवल्याची घटना ताजी असतानाच आज हुडकेश्वर परिसरात अशीच घटना उघडकीस आल्याने नागपुरात खळबळ उडाली आहे.
क्षुल्लक वाद टोकाला गेला अन्…
नयर शपी खान आणि पती समीर अन्सारी हे दोघेही मागील दोन वर्षांपासून हुडकेश्वरमधील टेकऑफ सिटी परिसरात फ्लॅटमध्ये भाड्याने राहतात. दोन दिवसापूर्वी पती-पत्नीमध्ये शाब्दिक वाद झाला होता. या वादाचा राग मनात धरुन पत्नी झोपेत असताना पतीने तिच्या डोक्यात सिलेंडर घालून तिची हत्या केली. पत्नी चा मृत्यू झाल्यानंतर पती रात्रभर पत्नीच्या मृतदेहाजवळ राहिला आणि दुसऱ्या दिवशी सकाळी त्याने पोलीस स्टेशन गाठत पोलिसांना सगळा घटनाक्रम सांगितला.
पोलिसांनी तात्काळ घटनास्थळी धाव घेत मृतदेह ताब्यात घेऊन शवविच्छेदनासाठी रुग्णालयात पाठवला. यानंर घटनास्थळाचा पंचनामा करत आरोपी पतीला अटक केली आहे. पती-पत्नीमध्ये नेमका कोणत्या कारणातून वाद होता, याबाबत पोलीस आरोपीची चौकशी करत आहेत.
