Nagpur Drug Action : नागपूरमध्ये 21 लाख रुपये एमडी ड्रग्जसह तस्कराला अटक, जरीपटका पोलिसांची कारवाई
जरीपटका पोलीस परिसरात गस्तीवर असताना एक संशयास्पद फिरणारा तरुण पोलिसांना पाहून पळू लागला. पोलिसांनी त्याला ताब्यात घेतलं असता तो एमडी तस्कर असल्याचं उघड झालं.
नागपूर : नागपुरात एका ड्रग तस्कर (Smuggler)ला 21 लाख रुपये किमतीच्या एमडी ड्रग (MD Drug)सह जरीपटका पोलिसांनी अटक (Arrest) केली आहे. पुढील तपास आता पोलीस करत आहे. शुभम निलमवार असे अटक करण्यात आलेल्या आरोपीचे नाव आहे. शुभम मोठ्या टोळीसोबत संलग्न असल्याचा संशय पोलिसांना असून, नागपुरात देखील एमडी व्यवसाय आणि ग्राहकांचा शोध घेऊन त्याची पाळेमुळे नष्ट करण्याचा प्रयत्न पोलीस करत आहेत. नागपुरात गेल्या काही दिवसात ड्रग तस्करीचं प्रमाण वाढत असल्याचे पोलिसांकडून होत असलेल्या कारवाईवरून दिसून येत आहे.
आरोपी आयटीआय झाला असून ड्रगचे व्यसन होते
जरीपटका पोलीस परिसरात गस्तीवर असताना एक संशयास्पद फिरणारा तरुण पोलिसांना पाहून पळू लागला. पोलिसांनी त्याला ताब्यात घेतलं असता तो एमडी तस्कर असल्याचं उघड झालं. पोलिसांनी त्याची झडती घेतली असता त्याच्याकडे 21 लाख रुपयांचे 213 ग्रॅम एमडी ड्रग्ज जप्त करण्यात आले आहे. आरोपी शुभम निलमवार हा आयटीआय झाला असून, त्याला ड्रग्जचे व्यसन होते. यातून त्याची ओळख ड्रग तस्करांशी झाली. आपले व्यसन पूर्ण करता करता शुभम देखील या व्यवसायात उतरला. मुंबईवरून एमडी ड्रगची खेप आणून नागपुरात विक्री सुरू केली.
मुंबईत अंमली पदार्थ विरोधी पथकाची मोठी कारवाई
अंमली पदार्थ विरोधी पथकाने काल मुंबईत मोठी कारवाई करत 2 कोटी 80 लाख रुपयांचे एमडी ड्रग्स जप्त केले. याप्रकरणी दोन नायजेरियन आरोपींना अटक करत त्यांच्याकडून 1 किलोपेक्षा अधिक एमडी ड्रग्स जप्त करण्यात आले आहे. अंमली पदार्थ विरोधी पथकाच्या वांद्रे युनिटने ही कारवाई केली आहे. (Jaripatka police arrested a smuggler with MD drugs worth Rs 21 lakh in Nagpur)
