बस स्थानकातून ड्रायव्हर-कंडक्टरची बॅग युनिफॉर्मसह चोरीला, सीसीटीव्हीमुळे चोरटा जेरबंद

यवतमाळ : बस स्थानकावर विश्रांतीला थांबलेल्या ड्रायव्हर-कंडक्टरची बॅग युनिफॉर्मसह चोरीला गेली. यवतमाळमध्ये घाटंजी बस स्थानकावर हा प्रकार घडला. चोर सीसीटीव्ही कॅमेरामध्ये कैद झाल्यामुळे पोलिसांनी केवळ एका तासात त्याला जेरबंद केले.

नेमकं काय घडलं?

घाटंजी बस स्थानकावर यवतमाळ डेपोची बस क्रमांक MH07-9437 रात्री थांबली होती. हॉल्ट असल्यामुळे ड्रायव्हर-कंडक्टर कुमरे आणि सीडाम बस स्थानकाच्या रुममध्ये रात्री विश्रांती घेत थांबले होते. त्यावेळी रात्री जवळपास दीड वाजताच्या सुमारास एका चोरट्याने चक्क चालक-वाहकाती बॅग, खाकी वर्दी आणि तिकीट फाडण्याची मशिन चोरून नेली.

कपड्यातील पैशांचे पाकीट, त्यामध्ये असलेली महत्त्वाची कागदपत्रे पाकिटातून काढून फक्त 900 रुपये रोख रक्कम लंपास करुन बस स्थानकाच्या बाहेर मशीन आणि कपडे फेकून दिले होते. ही घटना सीसीटीव्ही कॅमेर्‍यात कैद झाली.

सीसीटीव्ही फूटेजमुळे चोरटा जेरबंद

फुटेजमध्ये पाठमोरा दिसणारा चोरटा हा गजानन हिरालाल राठोड (रा. शिवपुरी तालुका कळम) असल्याचे निष्पन्न झाले. त्यानंतर घाटंजी पोलिसांनी त्याला केवळ एका तासात जेरबंद करुन गजाआड केले आहे.

नागपूरमध्ये एटीएममधून हायटेक चोरी

दुसरीकडे, एटीएममधून पैसे काढायचे मात्र त्याची नोंद कोणत्याही खात्यावर न होता सरळ बँकतून पैसे मात्र जात होते. हायटेक पद्धतीचा वापर करुन नागपुरातील वेगवेगळ्या भागातील एटीएममधून पैसे चोरणाऱ्या सायबर गॅंगला नुकतंच नागपूर पोलिसांनी जयपूरमधून अटक केली आहे. अनिस अब्दुल गफ्फुर आणि मोहमद तारीफ उमर हरियाणा अशी आरोपींची नावं आहेत. त्यांनी देशभरात अशाप्रकारे लूट केली असून त्यांची मोठी गॅंग असण्याचा संशय पोलिसांना आहे.

संबंधित बातम्या :

एटीएममधून हायटेक चोरी, सायबर गॅंगला नागपूर पोलिसांकडून जयपूरमध्ये अटक

म्होरक्या येरवडा तुरुंगात, टोळीच्या सदस्यांची मौजमजेसाठी चोरी, दोघे अटकेत

(Yawatmal Ghatanji Bus Station Driver Conductor Bag Uniform theft)