मित्राचा वाद तरुणाच्या जीवावर बेतला, दोघांच्या वादात भररस्त्यात निष्पाप तरुणासोबत अनर्थ घडला !

चंदन पुजाधिकारी, नाशिक : नाशिक शहरात गुन्हेगारी घटनांचे सत्र थांबण्याचे नाव घेत नाही. पुन्हा एकदा सिडको परिसरात एका युवकाची हत्या केल्याची धक्कादायक घटना घडली जुन्या वादातून चार ते पाच संशयितांनी तरुणावर जीवघेणा हल्ला करत त्याची हत्या केल्याची घटना नाशिमधील सिडको परिसरात घडली आहे. सिडकोच्या सावतानगर येथे पुर्ववैमनस्यातून 24 वर्षीय तरुणाची हत्या झाली. ही थरारक घटना सीसीटिव्ही कॅमेऱ्यात कैद झाली आहे. परशुराम बाळासाहेब नजान असे मयत तरुणाचे नाव आहे. विशेष म्हणजे परशुरामच्या मित्राचा आरोपींसोबत जुना वाद होता. यातून हा हल्ला झाला आणि परशुरामचा नाहक बळी गेला. याप्रकरणी अंबड पोलीस ठाण्यात गुन्हा दाखल करण्यात आला आहे. पोलीस आरोपींचा शोध घेत आहेत.

मित्रांसोबत जेवण करण्यासाठी हॉटेलमध्ये आला होता

परशुराम बाळासाहेब नजान हा तरुण सावतानगर येथील एका हॉटेलमध्ये मित्रांसोबत जेवण करण्यासाठी आला होता. त्याच्यासोबत असलेल्या मित्राचे आणि संशयित आरोपींचे जुने भांडण होते. याच भांडणातून त्याची कुरापत काढून तीन ते चार संशयितांनी हॉटेलच्या बाहेर पडलेला पेव्हर ब्लॉक परशुरामच्या डोक्यात टाकला. यात तो गंभीर जखमी झाला.

उपचारादरम्यान तरुणाचा मृत्यू

परशुरामच्या मित्रांनी त्याला जवळच्या खासगी रुग्णालयात उपचारासाठी नेले होते. मात्र अतिरक्तस्रावामुळे परशुरामला जिल्हा शासकीय रुग्णालयात उपचारासाठी दाखल करण्यात आले. मात्र उपचार सुरु असताना परशुरामचा मृत्यू झाल्याचे वैद्यकीय अधिकाऱ्यांनी स्पष्ट केले. ही सर्व धक्कादायक घटना सीसीटीव्ही कॅमेऱ्यात कैद झाली आहे. सीसीटीव्ही फुटेजच्या आधारे पोलीस आरोपींचा शोध घेत आहेत.