पोलीस उपनिरीक्षकाचा महिला पोलीस उपनिरीक्षकावर अत्याचार, महिला कर्मचाऱ्यांच्या सुरक्षेचा प्रश्न ऐरणीवर

नवी मुंबई : प्रेमाचे नाटक करुन लग्नाचे आमिष दाखवत पोलीस उपनिरीक्षकाने महिला उपनिरीक्षकावर बलात्कार केल्याची घटना नवी मुंबईत उघडकीस आली आहे. याप्रकरणी रबाळे पोलीस ठाण्यात आरोपी पोलीस उपनिरीक्षकाविरोधात गुन्हा दाखल करण्यात आला आहे. अनिकेत गुलाबराव शिंदे असे गुन्हा दाखल करण्यात आलेल्या 29 वर्षीय आरोपी पोलिसाचे नाव आहे.

तीन वर्षात अनेकदा बलात्कार केल्याचा पीडितेचा आरोप

आरोपी अनिकेत शिंदेने 2019 ते 2022 दरम्यान अनेकदा बलात्कार केले असल्याचे पीडित महिलेने तक्रारीत म्हटले आहे. अनिकेत शिंदे आणि पीडित महिलेची नाशिक येथे पोलीस प्रशिक्षणा दरम्यान ओळख झाली आणि प्रेमसंबंध जुळले.

लग्नाचे आमिष दाखवून विविध ठिकाणी नेत अत्याचार

पीडितेबरोबर प्रेमसंबंध प्रस्थापित करून आरोपीने तिला बदनाम करण्याची धमकी दिली. तसेच लग्नाचे आमिष दाखवून नाशिक शहरातील वेगवेगळ्या लॉजमध्ये, तसेच मुंबई, नागपूर आणि घणसोली येथील पीडितेच्या राहत्या घरी तिच्यासोबत लगट करून जबरदस्तीने शारिरीक तसेच अनैसर्गिक संबंध ठेवले.

आरोपी समतानगर पोलीस ठाण्यात कार्यरत

आरोपी अनिकेत शिंदे हा मुंबई कालिना परिसरातील समतानगर पोलीस ठाण्यात उपनिरीक्षक पदावर कार्यरत आहे. त्याच्या विरोधात भादंवि कलम 376, 376 (2)(n), 377, 354(अ), 354(ड) अंतर्गत गुन्हा नोंद करण्यात आला आहे.

आरोपीला अद्याप अटक नाही

दरम्यान, आरोपीला अद्याप अटक करण्यात आली नसून, पोलीस या प्रकरणाचा अधिक तपास करत आहेत. या घटनेमुळे पोलीस दलातील महिला कर्मचारी किती सुरक्षित आहेत? हा प्रश्न पुन्हा ऐरणीवर आला आहे.