सांगलीत भाजप नगरसेवकावर गोळीबार, भरस्त्यात गाडी अडवून विजय ताड यांची हत्या
जत येथील भाजपचे नगरसेवक विजय ताड हे आपल्या कारने चालले होते. यावेळी अज्ञात आरोपींनी भररस्त्यात त्यांची कार अडवून त्यांच्यावर हल्ला केला.
सांगली / शंकर देवकुळे : सांगलीतील जत नगरपालिकेचे भाजप नगरसेवकाची भररस्त्यात हत्या केल्याची खळबळजनक घटना घडली आहे. भररस्त्यात अज्ञात गुंडांनी नगरसेवकाची गाडी अडवून त्यांच्यावर गोळीबार केला. विजय ताड असे हत्या करण्यात आलेल्या नगरसेवकाचे नाव आहे. ताड यांची ईनोव्हा गाडी अडवून अज्ञातांनी त्यांच्यावर गोळ्या झाडल्या. जत मधल्या सांगोला रोडवरील अल्फान्सो स्कूलजवळ ही घटना घडली. या घटनेमुळे जिल्ह्यात एकच खळबळ माजली आहे. घटनेची माहिती मिळताच जत पोलीस घटनास्थळी दाखल झाले असून, घटनेचा तपास करत आहेत.
आधी गोळ्या घातल्या मग डोक्यात दगड घातला
विजय ताड हे जत येथील भाजपचे नगरसेवक आहेत. ताड हे शुक्रवारी दुपारी सांगोला रोडवरील अल्फान्सो स्कूलजवळ आपल्या इनोव्हा कारमध्ये होते. यावेळी अज्ञातांनी त्यांची कार अडवली. यानंतर आरोपींनी त्यांच्यावर गोळीबार केला. गोळीबारानंतर डोक्यात दगड घालून त्यांची हत्या केली. घटना उघड होताच परिसरात एकच गोंधळ उडाला.
मुलांना शाळेत आणायला चालले होते
नगरसेवक ताड हे आपल्या इनोव्हा गाडीतून सांगोला रोडवरील असणाऱ्या अल्फान्सो स्कूलमध्ये आपल्या मुलांना शाळेतून आणण्यासाठी निघाले होते. अल्फान्सो स्कूलच्या जवळ पोहोचले असता ताड यांचा पाठलाग करणाऱ्या अज्ञात हल्लेखोरांनी ताड यांची ईनोव्हा गाडी अडवली. त्यांच्या गाडीवर हल्ला करत ताड यांच्यावर थेट गोळ्या झाडल्या. त्यानंतर ताड हे गाडीतून खाली उतरताच हल्लेखोरांनी त्यांच्या डोक्यात दगड घातला. यामध्ये ते जागीच ठार झाले आहेत.
हत्येचे कारण अस्पष्ट
या घटनेमुळे जत शहरासह जिल्ह्यामध्ये एकच खळबळ उडाली आहे. मात्र हा हल्ला नेमका कोणत्या कारणातून आणि कोणी केला आहे हे मात्र समजू शकले नाही. या घटनेची माहिती मिळताच जत पोलिसांनी घटनास्थळी तातडीने धाव घेतली आहे. तसेच ताड समर्थकांनी या ठिकाणी मोठी गर्दी केली आहे. घटनेचे गांभीर्य ओळखून सांगलीचे पोलीस अधीक्षक बसवराज तेली देखील जतकडे रवाना झाले आहेत.
