Solapur Crime : रात्री वॉकसाठी घराबाहेर पडले ते परतलेच नाहीत, सकाळी सहाय्यक पोलीस निरीक्षकाचा थेट मृतदेहच सापडला !
सुट्टीनिमित्त गावी आलेले सहाय्यक पोलीस निरीक्षक नेहमीप्रमाणे रात्री जेवणानंतर वॉकला गेले. मात्र त्यानंतर कधीच परतले नाहीत.
सोलापूर / 3 ऑगस्ट 2023 : सोलापुरातील सांगोला तालुक्यात एक खळबळजनक घटना उघडकीस आली आहे. रात्री जेवणानंतर वॉकसाठी गेलेल्या सहाय्यक पोलीस निरीक्षकाची हत्या केल्याची घटना घडली आहे. सूरज विष्णु चंदनशिवे असे हत्या झालेल्या सहाय्यक पोलीस निरीक्षकाचे नाव आहे. चंदनशिवे यांची कुणी आणि कोणत्या कारणातून केली, याबाबत अद्याप माहिती मिळू शकली नाही. याप्रकरणी सांगोला पोलीस ठाण्यात गुन्हा दाखल करण्यात आला आहे. मयत चंदनशिवे सांगली शहर पोलीस दलात कार्यरत होते. सुट्टीनिमित्त मूळगावी आले होते. पोलीस प्रकरणाचा तपास करत आहेत.
जेवणानंतर वॉकसाठी गेले ते परतलेच नाहीत
मयत सूरज चंदनशिवे हे रात्री जेवून झाल्यानंतर 11 वाजण्याच्या सुमारास वॉकसाठी गेले. यावेळी उसाच्या शेतात आधीच दबा धरुन बसलेल्या अज्ञात इसमांनी त्यांच्यावर पाठीमागून हल्ला केला. यात चंदनशिवे यांचा जागीच मृ्तयू झाला. बराच वेळ झाला तरी चंदनशिवे घरी परतले नाहीत. घरच्यांनी त्यांना फोन लावला तर बंद येत होता. घरच्यांना काहीच थांगपत्ता लागत नव्हता.
पहाटे रस्त्यालगत मृतदेह सापडला
आज पहाटेच्या सुमारास सांगोला-वासूद रस्त्याच्या लगत चंदनशिवे यांचा मृतदेह रक्ताच्या थारोळ्यात आढळला. घटनेची माहिती मिळताच सांगोला पोलिसांनी घटनास्थळी धाव घेत मृतदेह ताब्यात घेतला. सोलापूर पोलीस अधीक्षक शिरीष देशपांडे देखील घटनास्थळी दाखल झाले. पोलिसांनी घटनास्थळाची पाहणी करत अज्ञात आरोपींविरोधात हत्येचा गुन्हा दाखल केला आहे.
पोलिसांकडून सखोल तपास सुरु
चंदनशिवे सांगली शहर पोलीस दलात कार्यरत होते. सुट्टीनिमित्त ते आपल्या मूळगावी सांगोला तालुक्यातील वासूद येथे आले होते. चंदनशिवे यांची हत्या नेमकी कोणत्या कारणातून झाली?, कुणी केली? याबाबत अद्याप माहिती मिळू शकली नाही. पोलीस प्रकरणाचा तपास करत आहेत. तपासाअंती सर्व स्पष्ट होईल.
