सकाळी कामावर गेलेली महिला परतलीच नाही, महिलेसोबत नेमकं काय घडलं?

प्रतिनिधी, पालघर : विरारच्या मांडवी पोलीस ठाण्याच्या हद्दीतील ही घटना आहे. एका विहिरीत रात्री उशिरा महिलेचा संशयास्पद मृतदेह मिळाला. जागृती राऊत (वय 39) असे महिलेचे नाव आहे. मांडवी परिसरातील शिरसाड राऊत पाडा येथील ती राहणारी आहे. काल सकाळी कामावर ही महिला गेली होती. पण रात्री घरी पोहचलीच नाही. तिचा शोध घेतला असता बाजूच्या एका विहिरीत मृतदेह सापडला आहे. यामुळे परिसरात खळबळ माजली. जागृती यांनी आत्महत्या केली की, त्यांचा कुणी खून करून विहिरीत टाकलं याचा शोध पोलीस घेत आहेत.

जागृती घरी न आल्याने चिंता वाढली

याबाबत मांडवी पोलीस ठाण्यात अकस्मात मृत्यूची नोंद करण्यात आली. ही हत्या की आत्महत्या याचा तपास पोलिसांनी सुरू केला आहे. जागृती राऊत या मुळच्या मांडवी परिसरातील राहणाऱ्या. त्याचे वय ३९ वर्षांचे आहे. नेहमीप्रमाणे त्या काल सकाळी कामावर गेल्या. संध्याकाळी घरी येणे अपेक्षित होते. पण, त्या घरी आल्या नाही. त्यामुळे कुटुंबीयांची चिंता वाढली.

विहिरीत सापडला मृतदेह

जागृती यांचे कुटुंबीय घाबरले. त्या कुठं गेल्या असतील, याचा शोध त्यांनी सुरू केला. नातेवाईकांना विचारपूस केली. जिथं कामावर जायची. त्यांच्याशी संपर्क साधला. पण, जागृती यांचा पत्ता लागला नाही. शेवटी आज सकाळी एका महिलेचा मृतदेह विहिरीत सापडल्याची घटना समोर आली. पाहतात तर तो मृतदेह जागृती राऊत यांचा होता.

जागृती यांची हत्या की आत्महत्या?

मांडवी पोलीस ठाण्याच्या हद्दीत ही घटना समोर आली. विहिरीत महिलेचा मृतदेह असल्याची माहिती पोलिसांना देण्यात आली. पोलीस घटनास्थळी दाखल झाले. त्यांनी शेजारील नागरिकांच्या मदतीने विहिरीतून मृतदेह बाहेर काढला. त्यानंतर घटनेचा पंचनामा केला. तो मृतदेह जागृती राऊत यांचा असल्याचे समोर आले. जागृती यांच्या नातेवाईकांना याची माहिती देण्यात आली. जागृती यांनी आत्महत्या केली की त्यांची हत्या करून मृतदेह विहिरीत ढकलण्यात आला,याचा शोध पोलीस घेत आहेत.