नवीन घराचे शिफ्टींग सुरु होते, अचानक सातव्या मजल्याच्या हॉलचा सज्जा कोसळला अन्…
सज्जा कोसळला तेव्हा सहाव्या मजल्यावरील हेतल दत्तानी ही महिलाही हॉलमध्ये असल्याने तिच्या सज्जा कोसळल्याने ती देखील यात जखमी झाली. तिघा जखमींना तात्काळ नजीकच्या रुग्णालयात उपचारासाठी दाखल करण्यात आले.
मुंबई / गोविंद ठाकूर : इमारतीच्या सातव्या मजल्याच्या हॉलचा सज्जा कोसळून तीन जण जखमी झाल्याची खळबळजनक घटना कांदिवलीत घडली आहे. हॉलचा सज्जा कोसळल्यानंतर सातव्या मजल्यावरील दोन जण थेट सहाव्या मजल्यावर कोसळले. यात सहाव्या मजल्यावरील एक महिलाही जखमी झाली. कांदिवली पश्चिम न्यू पार्क अव्हेन्यू इमारतीत ही दुर्घटना घडली. जखमींमध्ये एक पुरुष आणि दोन महिलांचा समावेश आहे. जखमींना उपचारासाठी रुग्णालयात दाखल करण्यात आले आहे. कुंजन शाह, पिंकल दरू आणि हेतल दत्तानी अशी अपघातात जखमी झालेल्या तिघांची नावे आहेत.
सामान शिफ्टींग सुरु असतानाच हॉलचा सज्जा कोसळला
कुंजन शाह यांनी कांदिवली पश्चिमेतील न्यू पार्क अव्हेन्यू इमारतीतील सातव्या मजल्यावर फ्लॅट खरेदी केला आहे. कालपासून नवीन घरात शिफ्टींगचे काम सुरु आहे. आज घरी सामान शिफ्ट करत असतानाच सायंकाळी शाह यांच्या फ्लॅटमधील हॉलचा सज्जा कोसळला. यावेळी हॉलमध्ये सामान शिफ्ट करत असलेले कुंजन शाह आणि त्यांची मेव्हणी पिंकल दरु हे दोघे थेट सहाव्या मजल्यावरील हॉलमध्ये कोसळले.
सज्जा कोसळल्याने तीन जण जखमी
सज्जा कोसळला तेव्हा सहाव्या मजल्यावरील हेतल दत्तानी ही महिलाही हॉलमध्ये असल्याने तिच्या सज्जा कोसळल्याने ती देखील यात जखमी झाली. तिघा जखमींना तात्काळ नजीकच्या रुग्णालयात उपचारासाठी दाखल करण्यात आले. तिघांवरही उपचार सुरु असून, आता त्यांची प्रकृती स्थिर आहे. या घटनेमुळे परिसरात एकच खळबळ माजली आहे.
अपघात प्रकरणी तपास सुरु
याप्रकरणी कांदिवली पोलीस ठाण्यात घटनेची नोंद करण्यात आली आहे. इमारतीचा सज्जा नेमका कशामुळे कोसळला याबाबत पालिका, कांदिवली पोलीस आणि अग्नीशमन दल तपास करत आहे. तपासाअंतीच अपघाताचे नेमके कारण स्पष्ट होईल.
