मुंबई-नाशिक महामार्गावर भीषण अपघात, दोन तरुण जागीच ठार
मुंबई-नाशिक महामार्गावर भरधाव कंटेनरने दोन दुचाकींना धडक दिल्याने दोन्ही दुचाकीस्वार जागीच ठार झाले. दोन्ही मृतदेह शवविच्छेदनासाठी रुग्णालयात पाठवण्यात आले.
शहापूर / सुनील जाधव : मुंबई-नाशिक महामार्गावर खातीवलीजवळ दुपारच्या सुमारास मुंबईच्या दिशेने जाणाऱ्या भरधाव कंटेनरने दोन बाईकला धडक दिल्याची घटना घडली. खातीवली येथील शुभवास्तु समोर हा अपघात घडला. या अपघातात दोन्ही बाईकवरील दोन तरुण जागीच ठार झाले. दोघांचे मृतदेह शहापूर उपजिल्हा रूग्णालयात शवविच्छेदनासाठी पाठवण्यात आले. गजानन काठोळे आणि कैलास भेरे अशी मयत दुचाकीस्वारांची नावे आहेत. उपजिल्हा रूग्णालयात नातेवाईकांनी गर्दी केली. पोलिसांनी घटनास्थळी दाखल होत पंचनामा सुरु केला.
कंटेनर चालकाला अटक
अपघाताची माहिती मिळताच वासिंद पोलीस घटनास्थळी दाखल झाले. घटनास्थळाचा पंचनामा करत वासिंद पोलीस स्थानकात गुन्हा दाखल करण्याची प्रक्रिया चालू आहे. संबंधित कंटेनर ड्रायव्हरला पोलिसांनी अटक केली असून, कंटेनर पडघा पोलीस स्थानकात जमा करण्यात आला आहे. याप्रकरणी अधिक तपास सहाय्यक पोलीस निरीक्षक शिवाजी बोलके करत आहेत.
कात्रज बोगद्यात भरधाव ट्रकची चार वाहनांना धडक
पुण्यातील कात्रज बोगद्यात भरधाव ट्रकने चार वाहनांना धडक दिल्याची घटना आज सकाळी घडली. या अपघातात सहा जण जखमी झाले असून, त्यांना उपचारासाठी नजीकच्या रुग्णालयात नेण्यात आले. घटनेनंतर ट्रक चालक फरार झाला आहे. अपघातात वाहनांचा चक्काचूर झाला आहे. याप्रकरणी सिंहगड पोलीस ठाण्यात घटनेची नोंद करण्यात आली आहे.
चंद्रपूरमध्ये बाईकची बसला धडक
वळण घेत असताना भरधाव बाईक बसला धडकल्याची घटना चंद्रपूर शहरात घडली. स्थानिक विश्रामगृहासमोर झालेल्या या अपघातात दोन बाईकस्वार गंभीर जखमी झाले. अल्ट्राटेक सिमेंट कंपनीच्या कर्मचाऱ्यांना घेऊन जाणारी ही बस शहराकडे वळसा घेत होती. मात्र अतिवेगात असलेल्या बाईकस्वारांचे नियंत्रण सुटले आणि हा अपघात झाला. स्थानिक रहिवाशांनी तातडीने जखमी युवकांना मदत केली.
