मुलाने सांगितले नाचू नको, तरीही आई डीजेवर नाचत राहिली; अखेर तरुण संतापला अन्…

अमरोहा : आईचे डीजेवर ताल धरणे मुलाला आवडले नाही. मुलाने आईला नाचण्यास मनाई केली, मात्र आईने मुलाकडे दुर्लक्ष करत डीजेवर ठेका धरला. यामुळे संतापलेल्या 25 वर्षीय तरुणाने गळफास घेत आत्महत्या केल्याची धक्कदायक उत्तर प्रदेशातील अमरोहा येथे उघडकीस आली आहे. या घटनेमुळे परिसरात एकच खळबळ माजली आहे. तरुणाच्या मृत्यूची बाब उघड होताच स्थानिकांनी एकच गर्दी केली होती. क्षुल्लक कारणातून तरुणाने घेतलेल्या टोकाच्या निर्णयामुळे कुटुंबीयांवर शोककळा पसरली आहे.

काय आहे प्रकरण?

हसनपूर कोतवाली क्षेत्रात एका गावात एका तरुणाचा विवाह समारंभ होता. यानिमित्ताने बुधवारी रात्री डीजेचे आयोजन करण्यात आले होते. डीजेच्या तालावर सर्व तरुण नाचत होते. यावेळी 50 वर्षीय महिलाही डान्स पहायला पोहचली.

महिलेने डीजेवर ठेका धरायला सुरुवात केली. तेथे महिलेचा मुलगाही उपस्थित होता. मुलाने आईला नाचण्यास मनाई केली. मात्र महिलेने मुलाच्या बोलण्याकडे दुर्लक्ष केले आणि नाचणे सुरुच ठेवले.

आई ऐकत नसल्याने नाराज तरुणाची आत्महत्या

अखेर मुलगा नाराज झाला आणि तेथून गेला. तरुण थेट तेथून जंगलात गेला आणि गळफास लावून घेत जीवनच संपवले. गुरुवारी सकाळी त्याचा मृतदेह जंगलात गळफास घेतलेल्या अवस्थेत आढळून आला.