अभिनेत्री उर्मिला निंबाळकरला आला भयानक अनुभव, भर बाजारात दोन वर्षांच्या मुलासोबत घडलं असं काही…

पुणे | 8 नोव्हेंबर 2023 : मराठी मनोरंजन सृष्टीतील अभिनेत्री आणि प्रसिद्ध यू-ट्यूबर उर्मिला निंबाळकर (actress urmila nimbalkar) ही खूपच प्रसिद्ध आहे. सोशल मीडियावर ती सतत नवनवे अनुभव शेअर करत असते. चाहतेही तिच्या पोस्टला भरभरून प्रतिसाद देत असतात. सध्या ती अभिनय क्षेत्रात कार्यरत नसली तरी यू-ट्यूबच्या माध्यमातून ती प्रचंड लोकप्रिय झाली आहे.

तिच्या सोशल मीडियावर ती स्वत:चे आणि तिचा नवरा सुकीर्त गुमास्ते आणि मुलगा अथांग या दोघांचेही बरेच फोटो, व्हिडीओ शेअर करत असते. तसेच मुलासोबतचे अनेक अनुभवही ती पोस्ट करते. मात्र नुकताच तिने एक असा अनुभव शेअर केला जो वाचून तुम्हीही क्षणभरासाठी सुन्न व्हाल. ती नवरा आणि मुलासोबत बाजारात खरेदीसाठी गेलेली असताना, तिच्या मुलासोबत जे घडलं ते वाचून कोणीही हादरेल. तिथे नेमकं काय झालं, वाचूया…

उर्मिलाने ही पोस्ट लिहीत चाहत्यांना एक विनंतीदेखील केली आहे.

उर्मिलाची पोस्ट तिच्या शब्दात जशीच्या तशी…

“एक कळकळीची विनंती… आज (काल) संध्याकाळी मी, सुकीर्त आणि अथांग रस्त्यावर आकाशकंदील खरेदी करताना, मागून अचानक एक बाई आल्या. त्यांनी अथांगला अचानक मागून पकडले आणि जोरात त्याचे गाल ओढले. त्यामुळे तो खूपच घाबरला आणि रडायला लागला. ही बाळांमधील या वयातील अतिशय नैसर्गिक प्रतिक्रिया आहेत. त्याला ‘Stranger Danger’ असे वैज्ञानिक नावही आहे.”

” अथांगला व्हिडीओमध्ये पाहून त्याच्याविषयी प्रेमाची भावना असणे हे अगदी बरोबर आहे. पण २५ महिन्याच्या बाळाला त्याच्या इच्छेविरुद्ध ओढून त्याचे फोटो काढणे, तो रडत असतानाही त्याला ओढून स्वतःच्या जवळ खेचणे, बाहेरील अस्वच्छ हाताने बाळाला पकडणे, तो हात लावू देत नाही म्हणून पाठमोरे होऊन त्याला नावं ठेवत जाणे हे अयोग्य आहे आणि अथांगसाठी असुरक्षितही.

विचारल्यानंतर फोटोच काय तर घरी जेवायला सुद्धा येऊ आम्ही, परंतु आपल्या अट्टाहासात बाळाचे हाल करणे मला पटत नाही,” असं स्पष्ट आणि परखड मत उर्मिलाने या तिच्या स्टोरीमधून मांडलं. तिच्या या पोस्टवर अनेकांनी कमेंट्स केल्या.