Arjun Kapoor | मलायकाच्या प्रेग्नंन्सीच्या चर्चांवर अर्जुन कपूरचं उत्तर; म्हणाला “आमचं खासगी आयुष्य हे..”
अर्जुन आणि मलायका लवकरच आई-बाबा बनणार आहेत, अशा आशयाचं वृत्त सोशल मीडियावर व्हायरल झालं होतं. इतकंच नव्हे तर लंडनच्या ट्रिपदरम्यान दोघांनी त्यांच्या कुटुंबीयांना आणि जवळच्या मित्रमैत्रिणींना याविषयीची माहिती दिली, असंही त्यात म्हटलं होतं.
मुंबई : गेल्या वर्षी नोव्हेंबर महिन्यात अभिनेत्री मलायका अरोरा गरोदर असल्याच्या चर्चांना उधाण आलं होतं. त्यावेळी बॉयफ्रेंड अर्जुन कपूरने मलायकाच्या प्रेग्नंन्सीच्या चर्चांवर उत्तर देत पूर्णविराम दिला होता. मलायकाच्या प्रेग्नंन्सीच्या चर्चांमुळे त्यावेळी अर्जुन भलताच संतापला होता. आता नुकत्याच दिलेल्या एका मुलाखतीत अर्जुन पुन्हा एकदा अशा चर्चांवर व्यक्त झाला आहे. त्या चर्चांचा त्याच्यावर परिणाम काय झाला, याविषयीही त्याने सांगितलं आहे. अर्जुन आणि मलायका गेल्या काही वर्षांपासून एकमेकांना डेट करत आहेत. 2019 मध्ये या दोघांनी आपलं रिलेशनशिप ‘ऑफिशिअल’ केलं होतं. तेव्हापासून सोशल मीडियावर दोघं एकमेकांसोबतचे फोटो पोस्ट करत खुलेपणाने प्रेम व्यक्त करताना दिसतात.
‘बॉलिवूड बबल’ या वेबसाइटला दिलेल्या मुलाखतीत अर्जुन म्हणाला, “नकारात्मकता ही अत्यंत सोप्या पद्धतीने पसरवली जाऊ शकते. त्यामुळे लोकांचं लक्ष फार लवकर वेधलं जातं. अशा गोष्टींकडे लोक खेचले जातात, म्हणूनच या अफवा लवकर पसरतात. आम्ही अभिनेते आहोत, पण आमचं खासगी आयुष्य हे नेहमीच खासगी नसतं. अभिनयक्षेत्रात असल्याने काही प्रमाणात तुम्हाला अशा गोष्टी खपवून घ्यावा लागतात.”
“अशा वृत्तांमध्ये काही गोष्टींचा उल्लेख नसतो पण प्रेक्षकांपर्यंत पोहोचण्यासाठी आम्ही माध्यमांवर अवलंबून असतो. पण आम्हीसुद्धा माणूसच आहोत याची तुम्ही किमान तरी दखल घ्यावी अशी आमची इच्छा आहे. त्यामुळे आमच्याबद्दल खूप महत्त्वाचं काही लिहिताना किमान एकदा तरी आमच्याकडून सत्यता तपासून घ्या. किमान एवढं तरी करा. तुम्ही गोष्टी तपासून घेतल्या पाहिजेत, त्याबद्दल अंदाज वर्तवू नये. एखाद्या व्यक्तीसाठी खूप महत्त्वाची असणारी गोष्ट तुम्ही इतक्या सहजरित्या पसरवू नये”, असं तो पुढे म्हणाला.
View this post on Instagram
मलायकाच्या प्रेग्नंसीच्या बातमीचा स्क्रीनशॉट शेअर करत अर्जुनने लिहिलं होतं, “तुम्ही सर्वांत खालची पातळी गाठली आहे आणि ते सुद्धा अत्यंत अनौपचारिक, असंवेदनशील आणि अनैतिक पद्धतीने तुम्ही ही बातमी दिली. हा पत्रकार सतत अशा बातम्या लिहितो आणि आम्ही फेक गॉसिप आर्टिकल्सकडे दुर्लक्ष करतो म्हणून त्याचं निभावून जातं. पण आता पुरे झालं.”
‘आमच्या खासगी आयुष्याशी खेळण्याची हिंमत करू नका’, असा थेट इशारा अर्जुनने या पोस्टद्वारे दिला होता. अर्जुन आणि मलायका लवकरच आई-बाबा बनणार आहेत, अशा आशयाचं वृत्त सोशल मीडियावर व्हायरल झालं होतं. इतकंच नव्हे तर लंडनच्या ट्रिपदरम्यान दोघांनी त्यांच्या कुटुंबीयांना आणि जवळच्या मित्रमैत्रिणींना याविषयीची माहिती दिली, असंही त्यात म्हटलं होतं.
