Siddhanth Kapoor: ड्रग्ज प्रकरणी मुलाला ताब्यात घेतल्यानंतर शक्ती कपूर यांची पहिली प्रतिक्रिया, म्हणाले..
बेंगळुरूमध्ये झालेल्या एका रेव्ह पार्टीतून सिद्धांतला पोलिसांनी ताब्यात घेतलं आहे. या पार्टीत त्याने ड्रग्जचं सेवन केल्याचा आरोप आहे. याप्रकरणी आता शक्ती कपूर यांनी प्रतिक्रिया दिली आहे.
अभिनेते शक्ती कपूर (Shakti Kapoor) यांचा मुलगा आणि अभिनेत्री श्रद्धा कपूरचा भाऊ सिद्धांत कपूर (Siddhanth Kapoor) वादाच्या भोवऱ्यात अडकला आहे. बेंगळुरूमध्ये झालेल्या एका रेव्ह पार्टीतून सिद्धांतला पोलिसांनी ताब्यात घेतलं आहे. या पार्टीत त्याने ड्रग्जचं सेवन केल्याचा आरोप आहे. याप्रकरणी आता शक्ती कपूर यांनी प्रतिक्रिया दिली आहे. “मी सध्या फक्त एकच गोष्ट बोलू शकतो की हे शक्य नाही”, असं ते ‘ई टाइम्स’शी बोलताना म्हणाले. एम. जी. रोडवरील एका हॉटेलमध्ये ड्रग्जचा वापर होत असल्याची माहिती पोलिसांना मिळाली. त्यानंतर त्यांनी त्या हॉटेलवर छापा टाकला. ड्रग्जचं सेवन केलं की नाही हे तपासण्यासाठी तिथल्या काही जणांची चाचणी (drugs test) करण्यात आली. यावेळी इतर सहा जणांसोबत श्रद्धा कपूरच्या भावाचा रिपोर्टही पॉझिटिव्ह आला.
सिद्धांत हा रविवारी मुंबईहून बेंगळुरूला गेला होता. रविवारी रात्री उशिरा झालेल्या पार्टीदरम्यान ही घटना घडली. सिद्धांत कोणत्या हॉटेलमध्ये थांबला होता, याबद्दलची माहिती कपूर कुटुंबीयांना नव्हती. ज्या सहा जणांनी ड्रग्जचं सेवन केलं, त्यात सिद्धांतही होता, अशी माहिती बेंगळुरू पोलिसांनी दिली. “सिद्धांत कपूरच्या ड्रग्ज चाचणीचा रिपोर्ट पॉझिटिव्ह आला आहे. त्याला उल्सूर पोलीस ठाण्यात आणलं गेलंय”, असं बेंगळुरू शहरचे डीसीपी डॉ. भीमाशंकर म्हणाले.
सिद्धांत कपूर पोलिसांच्या ताब्यात-
Karnataka | Actor Shraddha Kapoor’s brother Siddhanth Kapoor detained during police raid at a rave party in a Bengaluru hotel, last night. He is among the 6 people allegedly found to have consumed drugs: Bengaluru Police pic.twitter.com/UuHZKMzUH0
— ANI (@ANI) June 13, 2022
अभिनेता सुशांत सिंह राजपूतच्या मृत्यूनंतर ड्रग्ज प्रकरणाचा तपास करताना 2020 मध्ये एनसीबीने अभिनेत्री श्रद्धा कपूरचीशी चौकशी केली होती. त्यावेळी श्रद्धाने सुशांतच्या पवना इथल्या गेस्ट हाऊसमधील पार्टीला हजर राहिल्याचं कबूल केलं होतं. मात्र त्या पार्टीत ड्रग्जचं सेवन केलं नसल्याचं तिने स्पष्ट केलं. सुशांत आणि श्रद्धाने ‘छिछोरे’ या चित्रपटात एकत्र काम केलं होतं. या चित्रपटाला बॉक्स ऑफिसवर यश मिळाल्यानंतर ही पार्टी आयोजित करण्यात आली होती.
