ट्रॅफिकमध्ये अडकला पायलट? ‘इंडिगो’ एअरलाइनवर भडकला कपिल शर्मा
कॉमेडियन कपिल शर्मा चेन्नईहून मुंबईला इंडिगो विमानाने प्रवास करत होता. या प्रवासादरम्यान त्याला आलेला वाईट अनुभव त्याने सोशल मीडियावर सांगितला. इंडिगो या एअरलाइनच्या सेवेवर त्याने तीव्र संताप व्यक्त केला. पायलट ट्रॅफिकमध्ये अडकल्याने विमानाला उशीर झाल्याचं कारण त्यांनी दिलं होतं.
मुंबई : 30 नोव्हेंबर 2023 | कॉमेडियन कपिल शर्माने बुधवारी ‘इंडिगो’ एअरलाइनच्या सेवेवर तीव्र संताप व्यक्त केला. प्रवासासाठी उशीर झाल्याचा आणि व्यवस्थापनाचा अभाव असल्याचा आरोप त्याने केला. इंडिगो ही देशातील सर्वांत मोठी व्यावसायिक एअरलाइन म्हणून ओळखली जाते. मात्र कपिल शर्माला या एअरलाइनने प्रवास करताना अत्यंत वाईट अनुभव आला. याविषयी त्याने सोशल मीडियावर पोस्ट लिहित राग व्यक्त केला आहे. या विमानातून प्रवास करणाऱ्या प्रवाशांना जवळपास तासभर शटल बसमध्ये प्रतीक्षा करावी लागली. आश्चर्याची बाब म्हणजे विमानाचा पायलट हा ट्रॅफिकमध्ये अडकल्याने प्रवाशांना तासभर बसून राहावं लागलं होतं. कपिलने काही प्रवाशांचा व्हिडीओसुद्धा सोशल मीडियावर पोस्ट केला आहे. यामध्ये संतप्त प्रवासी एअरलाइनच्या कर्मचाऱ्यांशी भांडताना दिसत आहेत.
कपिल शर्माची पोस्ट-
‘प्रिय इंडिगो, आधी तुम्ही आम्हाला बसमध्ये 50 मिनिटांपर्यंत प्रतीक्षा करायला लावलं आणि नंतर तुमची टीम सांगतेय की पायलट ट्रॅफिकमध्ये अडकला आहे. काय? खरंच? रात्री 8 वाजता आमच्या विमानप्रवासाला सुरुवात झाली पाहिजे होती. पण आता 9.20 वाजले आहेत आणि अद्याप पायलट पोहोचलेला नाही. तुमच्यामुळे त्रास सहन करणारे हे 180 प्रवासी पुन्हा इंडिगोने प्रवास करतील असं तुम्हाला वाटतं का? कधीच नाही’, अशा शब्दांत कपिलने राग व्यक्त केला.
People r suffering bcoz of you @IndiGo6E lying lying n lying, there r some old passengers on wheel chairs, not in a very good health condition. Shame on you #indigo 👎 pic.twitter.com/87OZGcUlPU
— Kapil Sharma (@KapilSharmaK9) November 29, 2023
Now they r de boarding all the passengers n saying we will send you in another aircraft but again we have to go back to terminal for security check 👏👏👏👏👏 #indigo👎 pic.twitter.com/NdqbG0xByt
— Kapil Sharma (@KapilSharmaK9) November 29, 2023
Dear @IndiGo6E first you made us wait in the bus for 50 minz, and now your team is saying pilot is stuck in traffic, what ? Really ? we supposed to take off by 8 pm n it’s 9:20, still there is no pilot in cockpit, do you think these 180 passengers will fly in indigo again ? Never…
— Kapil Sharma (@KapilSharmaK9) November 29, 2023
यानंतर कपिलने आणखी एक व्हिडीओ पोस्ट केला, ज्यामध्ये प्रवाशांना विमानातून बाहेर उतरवलं जात आहे. ‘आता ते विमानातून प्रवाशांना बाहेर काढत आहेत आणि दुसऱ्या एअरक्राफ्टमध्ये पाठवणार असल्याचं सांगत आहेत. पण आता आम्हाला पुन्हा एकदा टर्मिनलवर सेक्युरिटी चेकसाठी जावं लागणार. लोकांना तुमच्यामुळे त्रास सहन करावा लागतोय आणि इंडिगो आमच्याशी फक्त आणि फक्त खोटंच सांगतेय. प्रवाशांमध्ये काही वयोवृद्ध आणि काही व्हिलचेअरवर आहेत, ज्यांची प्रकृती ठीक नाही. खरंच तुम्हाला लाज वाटली पाहिजे’, अशी तक्रार कपिलने केली. कपिलने ‘एक्स’वर (ट्विटर) इंडिगो एअरलाइनच्या अधिकाऱ्यांनाही टॅग केलं आहे. चेन्नई ते मुंबई प्रवासादरम्यान हा त्रास सहन करावा लागल्याचं त्याने नमूद केलं.
एखाद्या एअरलाइनकडून प्रवाशांची अशा प्रकारे गैरसोय झाल्याची ही काही पहिलीच घटना नाही. याआधीही बऱ्याच सेलिब्रिटींना अशा पद्धतीना अनुभव आला. त्यानंतर त्यांनी सोशल मीडियाद्वारे एअरलाइनची तक्रार केली. कपिल शर्माच्या पोस्टवर नेटकऱ्यांनी प्रतिक्रिया देत एअरलाइनवर संताप व्यक्त केला आहे.
