Tamasha Live: आली रे आली ‘कडकलक्ष्मी’ आली; सोनाली कुलकर्णीने गायलं ‘तमाशा लाईव्ह’मधील गाणं
या गाण्याला पंकज पडघन यांनी संगीत दिलं असून विशेष बाब म्हणजे हे गाणं सोनाली कुलकर्णी हिनेच गायलं आहे. या गाण्याचं नृत्य दिग्दर्शन उमेश जाधव यांनी केलं आहे. यात सोनाली कुलकर्णी आक्रमक स्वरूपात तिची व्यथा व्यक्त करत आहे. गाण्याचं नाव 'कडक लक्ष्मी' असून नावाप्रमाणेच या गाण्याचे बोल आहेत.
‘तमाशा लाईव्ह’ (Tamasha Live) चित्रपटातील गाण्यांना संगीतप्रेमी चांगलाच प्रतिसाद देत आहेत. आता नुकतंच शेफाली अर्थात सोनाली कुलकर्णी (Sonalee Kulkarni) हिचं ‘कडक लक्ष्मी’ (Kadaklakshmi) हे गाणं सोशल मीडियावर झळकलं असून या गाण्याला क्षितीज पटवर्धन यांनी शब्दबद्ध केलं आहे. तर या गाण्याला पंकज पडघन यांनी संगीत दिलं असून विशेष बाब म्हणजे हे गाणं सोनाली कुलकर्णी हिनेच गायलं आहे. या गाण्याचं नृत्य दिग्दर्शन उमेश जाधव यांनी केलं आहे. यात सोनाली कुलकर्णी आक्रमक स्वरूपात तिची व्यथा व्यक्त करत आहे. गाण्याचं नाव ‘कडक लक्ष्मी’ असून नावाप्रमाणेच या गाण्याचे बोल आहेत. चित्रपटात सोनाली कुलकर्णी, सचित पाटील, सिद्धार्थ जाधव, हेमांगी कवी, पुष्कर जोग, नागेश भोसले, मृणाल देशपांडे, मनमीत पेम, आयुषी भावे, भरत जाधव यांच्या भूमिका आहेत.
‘कडक लक्ष्मी’ गाण्याबद्दल गीतकार क्षितीज पटवर्धन म्हणाला, “हे गाणं मी शब्दबद्ध केलं असले तरी सोनालीने अगदी उत्तमरित्या ते सादर केलं आहे. मुळात हे गाणं ती स्वतः गायली आहे. त्यामुळे या गाण्यातील भावना या तिच्या चेहऱ्यावर आपसूकच दिसून येत आहेत.” ‘तमाशा लाईव्ह’मध्ये सचित आणि सोनालीचा रॉकिंग डान्सही पाहायला मिळत आहे. यात पाश्चिमात्य नृत्यासोबतच महाराष्ट्राची लोककलाही झळकत असून नृत्याला दिलेले हे आधुनिक रूप ही या चित्रपटाची खासियत आहे.
‘प्लॅनेट मराठी’चे प्रमुख, संस्थापक अक्षय बर्दापूरकर म्हणतात, “संगीतातून कथा सांगणारा ‘तमाशा लाईव्ह’ हा पहिला मराठी चित्रपट आहे. संजय जाधव यांनी या चित्रपटाच्या माध्यमातून एक आगळावेगळा प्रयोग सादर केला आहे. या गाण्यांना मिळणाऱ्या प्रेक्षकांच्या प्रतिक्रिया पाहून संजय जाधव यांचा हा प्रयोग नक्कीच यशस्वी होईल याची मला खात्री आहे.”
पहा व्हिडीओ-
‘तमाशा लाईव्ह’बद्दल दिग्दर्शक संजय जाधव म्हणतात, ”’तमाशा लाईव्ह’च्या माध्यमातून आम्ही प्रेक्षकांना काहीतरी नाविन्यपूर्ण देण्याचा प्रयत्न केला आहे. चित्रपटात अतिशय कसलेले कलाकार, तगडी संगीत टीम आहे. हा एक संगीतमय चित्रपट असला तरी त्याला आधुनिकतेची जोड लाभली आहे. चित्रीकरणाआधी आमची अडीच महिने कार्यशाळा सुरु होती. कार्यशाळेच्या सुरुवातीलाच या कलाकारांना व्यक्तिरेखेशी एकरूप होणे जरा कठीण जात होते. त्या व्यक्तिरेखेला शंभर टक्के न्याय मिळत नसल्याची भावना कलाकारांकडून व्यक्त होत होती. मात्र अडीच महिन्यांनी हे चित्र पूर्णपणे पालटले. मला आठवते, चित्रीकरण संपल्यानंतर एकदा एडिटला बसल्यावर मला सोनालीची एक लाईन सापडत नव्हती आणि ती त्यावेळी एका चित्रपटाच्या प्रमोशनमध्ये व्यस्त होती. मी तिला फोन केला आणि अल्पावधीतच तिने मला व्हॉट्सअपवर संपूर्ण सीन रेकॉर्ड करून पाठवला. एवढी ती त्या व्यक्तिरेखेशी एकरूप झाली होती आणि तीच नाही तर चित्रपटातील प्रत्येक कलाकार अडीच महिन्यांनी आपापल्या व्यक्तिरेखेशी जोडले गेले होते.”
प्लॅनेट मराठी, माऊली प्रॉडक्शन, एटीएट पिक्चर्स प्रस्तुत या चित्रपटाची निर्मिती अक्षय बर्दापूरकर यांनी केली आहे. सौम्या विळेकर, डॉ. मनीषा तोलमारे, समीर केळकर, अजय उपर्वात सहनिर्मित या चित्रपटाची कथा मनीष कदम यांची असून संवाद अरविंद जगताप यांचे आहेत. ‘तमाशा लाईव्ह’ चित्रपट येत्या 15 जुलै रोजी चित्रपटगृहात प्रदर्शित होणार आहे.
