Drishyam 3: पुन्हा रंगणार रहस्याचा खेळ; मोहनलाल यांच्या ‘दृश्यम 3’ची घोषणा
2015 मध्ये दृश्यमचा हिंदी रिमेक प्रेक्षकांच्या भेटीला आला होता. यामध्ये अजय देवगण, तब्बू आणि श्रिया सरन यांनी मुख्य भूमिका साकारल्या होत्या.
चित्रपट निर्माते अँटनी पेरुंबवूर यांनी ‘दृश्यम 3’ (Drishyam 3) या चित्रपटाची घोषणा केली आहे. मोहनलाल (Mohanlal) यांची मुख्य भूमिका असलेल्या या प्रसिद्ध चित्रपटाच्या तिसऱ्या भागाची घोषणा नुकत्याच एका पुरस्कार सोहळ्यात झाली. तिसऱ्या भागातही मोहनलाल हेच जॉर्जकुट्टीची (Georgekutty) भूमिका साकारणार आहेत. दृश्यम हा चित्रपट 2013 मध्ये प्रदर्शित झाला होता आणि त्यानंतर गेल्या वर्षी या चित्रपटाचा दुसरा भाग प्रेक्षकांच्या भेटीला आला होता. दृश्यम 3 ची घोषणा होताच सोशल मीडियावर नेटकऱ्यांकडून आनंद व्यक्त करण्यात आला. ज्या पुरस्कार सोहळ्यात अँटनी यांनी चित्रपटाची घोषणा केली, त्याचा व्हिडीओसुद्धा ट्विटरवर व्हायरल होत आहे. रहस्याने परिपूर्ण असलेल्या या चित्रपटाच्या दोन्ही भागांना प्रेक्षकांचा दमदार प्रतिसाद मिळाला होता.
2013 मध्ये प्रदर्शित झालेल्या दृश्यम या मल्याळम चित्रपटाचं दिग्दर्शन जितू जोसेफने केल होतं. यामध्ये मोहनलाल, मीना दुरईराज आणि अनसिबा हासन यांच्या मुख्य भूमिका होत्या. प्रेक्षक-समिक्षकांकडून या चित्रपटाला दमदार प्रतिसाद मिळाला होता. त्याचा सीक्वेल ‘दृश्यम 2: द सिजप्शन’ हा गेल्या वर्षी ॲमेझॉन प्राईम व्हिडीओवर प्रदर्शित झाला. सीक्वेलवरही प्रेक्षकांनी भरभरून कौतुकाचा वर्षाव केला होता.
2015 मध्ये दृश्यमचा हिंदी रिमेक प्रेक्षकांच्या भेटीला आला होता. यामध्ये अजय देवगण, तब्बू आणि श्रिया सरन यांनी मुख्य भूमिका साकारल्या होत्या. यावर्षी जून महिन्यात हैदराबादमध्ये दुसऱ्या भागाचं शूटिंग पार पाडलं. दृश्यम 2 चा हिंदी रिमेक येत्या 18 नोव्हेंबर रोजी प्रदर्शित होणार आहे. हिंदीसोबतच हा चित्रपट कन्नड, तमिळ आणि तेलुगूमध्येही प्रदर्शित झाला.
