तू खूप मोठा झालास असं तुला वाटतं का? कपिल शर्मावर भडकला ‘शक्तीमान’
'शक्तीमान'ची भूमिका साकारणारे अभिनेते मुकेश खन्ना हे पुन्हा एकदा कॉमेडियन कपिल शर्मावर भडकले आहेत. नुकत्याच दिलेल्या एका मुलाखतीत त्यांनी कपिलच्या शोमध्ये न जाण्यामागचं कारण सांगितलं आहे.
‘शक्तीमान’ची भूमिका साकारून घराघरात पोहोचलेले अभिनेते मुकेश खन्ना हे त्यांच्या बिनधास्त स्वभावासाठी ओळखले जातात. विविध मुद्द्यांवर ते बेधडकपणे आपली मतं मांडतात. 2020 मध्ये त्यांनी कॉमेडियन कपिल शर्माच्या शोमध्ये जाण्यास नकार दिला होता. इतकंच नव्हे तर त्यांनी कपिल शर्माच्या शोला ‘दर्जाहिन’ म्हटलं होतं. आता नुकत्याच दिलेल्या एका मुलाखतीत त्यांनी यावर प्रतिक्रिया दिली आहे. कपिलच्या शोमध्ये जाणं ते का टाळतात, याचं उत्तर त्यांनी दिलंय. एका वेबसाइटला दिलेल्या मुलाखतीत मुकेश यांनी सांगितलं की त्यांना कपिल शर्माचा शो अश्लीलतेमुळे आवडत नाही. मुकेश खन्ना म्हणाले, “मला अश्लीलतेच्या कारणामुळे बिग बॉस किंवा द कपिल शर्मा शो आवडत नाही. पण कपिल हा खूप चांगला एंटरटेनर आहे यात काही शंका नाही.”
या मुलाखतीत मुकेश खन्ना यांनी असे दोन किस्से सांगितले, ज्यानंतर त्यांनी कपिल शर्माच्या शोमध्ये जाण्यास नकार दिला होता. ते म्हणाले, “माझ्यासोबत दोन घटना घडल्या. मी असं म्हणणार नाही की त्यामुळे मी ‘अँटी कपिल’ (कपिलविरोधी) झालो पण मला त्याचा शो आवडला नाही. ती व्यक्ती कदाचित चांगली असेल पण तुम्हाला त्या व्यक्तीसोबत कम्फर्टेबल वाटत नाही. पहिला किस्सा हा कॉमेडी सर्कस या शोचा आहे. यामध्ये कपिलने शक्तीमानचा पोशाख परिधान केला होता. मला वाटत नाही की कपिलला त्याची चूक उमगली असेल, पण याबद्दल मी कृष्णा अभिषेकसोबत बोललो होतो. कॉमेडी सर्कसमध्ये ते स्किट्स सादर करायचे. त्यावेळी कपिलने केलेली चूक अशी होती की तो शक्तीमानच्या वेशात होता आणि त्याच्यासमोर एक मुलगी होती. तिच्या बाजूला एक बेड दाखवला होता. मी म्हटलं की, हा काय मूर्खपणा आहे. आम्ही शक्तीमानच्या भूमिकेला इतक्या चांगल्या पद्धतीने दाखवलं होतं आणि तुम्ही असं दाखवताय की तो व्यस्त असल्याने मुलीकडे जाऊ शकत नाही. नाहीतर शक्तीमानने त्या मुलीला पटवलं असतं. तुम्ही फक्त कॉमेडीसाठी हे सर्व करताय. मी कृष्णाकडे याचा जाब विचारला होता. तेव्हा कृष्णाने मला सांगितलं होतं की तो ही कॉमेडी करणार होता, पण कपिलने त्याच्याकडून ते स्वत:साठी घेतलं होतं.”
“दुसरा प्रसंग हा एका पुरस्कार सोहळ्यातील आहे. मी पहिल्या रांगेत बसलो होतो आणि त्यावेळी कपिलने इंडस्ट्रीत सुरुवातच केली होती. कपिल माझ्या बाजूला दहा ते वीस मिनिटं बसला होता, पण तो एकदाही माझ्याशी बोलायला आला नाही. त्याने फक्त पुरस्कार स्वीकारला आणि नंतर तिथून निघून गेला. या दोन घटना माझ्या डोक्यात कायम आहेत. म्हणून तो असंस्कृत असल्याचं मी म्हटलं होतं. तुम्हाला असं वाटतं का की तुम्ही खूप मोठे आहात? जेव्हा एखादी व्यक्ती अशी वागते, तेव्हा ती आदर गमावून बसते”, अशा शब्दांत त्यांनी राग व्यक्त केला.
