‘तू झूठी मैं मक्कार’ची जबरदस्त ॲडव्हान्स बुकिंग; रणबीर-श्रद्धाच्या चित्रपटाची होणार धमाकेदार सुरुवात
तू झूठी मैं मक्कार हा रोमँटिक कॉमेडी चित्रपट असून त्यात रणबीर कपूर आणि श्रद्धा कपूरची मुख्य भूमिका आहे. या चित्रपटाच्या निमित्ताने हे दोघं पहिल्यांदाच एकत्र काम करत आहेत. यामध्ये डिंपल कपाडियाचीही भूमिका आहे.
मुंबई : अभिनेता रणबीर कपूर आणि श्रद्धा कपूर यांच्या मुख्य भूमिका असलेला ‘तू झूठी मैं मक्कार’ हा चित्रपट लवकरच प्रेक्षकांच्या भेटीला येणार आहे. गेल्या काही दिवसांपासून हे दोन्ही कलाकार त्यांच्या चित्रपटाचं जोरदार प्रमोशन करत आहेत. प्रदर्शनाच्या चार दिवस आधी या रविवारी (5 मार्च) चित्रपटाच्या ॲडव्हान्स बुकिंगला सुरुवात झाली. पहिल्या दिवसाच्या ॲडव्हान्स बुकिंगचा आकडा पाहता रणबीर-श्रद्धाचा हा चित्रपट दमदार कमाई करणार असल्याचा अंदाज व्यक्त होत आहे. असं झाल्यास बॉलिवूडसाठी ही सकारात्मक बाब असेल. कारण शाहरुख खानचा ‘पठाण’ हा चित्रपट सोडता बॉक्स ऑफिसवर दुसऱ्या कोणत्या चित्रपटाने दमदार कामगिरी केली नाही.
2023 या वर्षांत आतापर्यंत प्रदर्शित झालेल्या चित्रपटांपैकी फक्त ‘पठाण’नेच रेकॉर्डब्रेक कमाई केली. कार्तिक आर्यनच्या ‘शहजादा’ आणि अक्षय कुमारच्या ‘सेल्फी’ या चित्रपटाने प्रेक्षकांची निराशा केली. मात्र ‘तू झूठी मैं मक्कार’ या चित्रपटाच्या ॲडव्हान्स बुकिंगचा आकडा हा बॉलिवूडसाठी आशेचा किरण ठरतोय. रविवारी रात्रीपर्यंत या चित्रपटाचे देशभरात जवळपास 30 हजार तिकिटं विकली गेली आहेत. या विक्रीतून जवळपास 1 कोटी रुपये कमाई होण्याची शक्यता आहे.
सध्याचा ट्रेंड पाहता रणबीर-श्रद्धाचा हा चित्रपट पहिल्या दिवशी जवळपास 15 कोटी रुपयांची कमाई करू शकतो. असं झाल्यास हा चित्रपट बॉक्स ऑफिसवर दमदार ओपनिंग करणारा पाचवा चित्रपट ठरेल. याआधी पठाण, ब्रह्मास्त्र, सूर्यवंशी आणि भुल भुलैय्या 2 यांसारख्या चित्रपटांनी पहिल्या दिवशी चांगली कमाई केली होती.
View this post on Instagram
तू झूठी मैं मक्कार हा रोमँटिक कॉमेडी चित्रपट असून त्यात रणबीर कपूर आणि श्रद्धा कपूरची मुख्य भूमिका आहे. या चित्रपटाच्या निमित्ताने हे दोघं पहिल्यांदाच एकत्र काम करत आहेत. यामध्ये डिंपल कपाडियाचीही भूमिका आहे. त्याचसोबत निर्माते बोनी कपूर आणि कॉमेडियन अनुभव सिंग बस्सी हे सुद्धा महत्त्वपूर्ण भूमिका साकारणार आहेत. अभिनेता म्हणून बोनी कपूर यांचा हा पहिलाच चित्रपट असेल. येत्या 8 मार्च रोजी हा चित्रपट प्रेक्षकांच्या भेटीला येणार आहे.
