Raj Kundra | गणपती विसर्जनात राज कुंद्राचा मास्क घालून डान्स; नेटकरी म्हणाले ‘स्वत:चीच खिल्ली उडवतोय’
अभिनेत्री शिल्पा शेट्टीचा पती आणि बिझनेसमन राज कुंद्रा जेव्हा मीडिया आणि पापाराझींसमोर येतो, तेव्हा नेहमीच तो चित्रविचित्र मास्कमागे चेहरा झाकण्याचा प्रयत्न करतो. पॉर्नोग्राफी प्रकरणात कारवाई झाल्याने तो तोंड लपवतोय, अशा शब्दांत नेटकऱ्यांनी त्याला अनेकदा ट्रोल केलं.
मुंबई | 21 सप्टेंबर 2023 : अभिनेत्री शिल्पा शेट्टी आणि तिचा पती राज कुंद्राच्या घरी दरवर्षीप्रमाणे यंदाही गणपती बाप्पाचं जल्लोषात आगमन झालं. शिल्पा शेट्टीच्या घरी दीड दिवसाचा गणपती असतो. दीड दिवस गणपती बाप्पाची मनोभावे पूजा केल्यानंतर ती गणरायाला धूमधडाक्यात निरोप देते. बुधवारी दिड दिवसाच्या गणपती बाप्पाचं विसर्जन करण्यात आलं. यावेळी शिल्पा शेट्टी आणि तिच्या कुटुंबीयांनी ढोल-ताशाच्या गजरावर ठेका धरला. मुलगा आणि बहीण शमिता शेट्टीसोबत नाचतानाचा शिल्पाचा व्हिडीओ सोशल मीडियावर चांगलाच व्हायरल झाला होता. या विसर्जन मिरवणुकीतील आणखी एका व्हिडीओने नेटकऱ्यांचं लक्ष वेधलं आहे. हा व्हिडीओ शिल्पाचा पती राज कुंद्राचा आहे. तुरुंगातून जामिनावर सुटल्यापासून राज कुंद्रा मीडिया आणि पापाराझींसमोर स्वत:चा चेहरा दाखवत नाही. विविध प्रकारचे मास्क चेहऱ्याला लावून तो कॅमेऱ्यासमोर येतो. विसर्जन मिरवणुकीतही राज एका नव्या मास्कमध्ये दिसला.
या नव्या मास्कमध्ये राज कुंद्राचा चेहरा पूर्णपणे झाकलेला होता. तोच मास्क घालून त्याने विसर्जन मिरवणुकीत डान्स केला. यावेळी शिल्पा त्याच्याकडे पाहून खूप हसत होती. राज आणि शिल्पाच्या या व्हिडीओ नेटकऱ्यांकडून विविध प्रतिक्रिया येत आहेत. ‘शिल्पा शेट्टीला नेमकं काय झालंय? तिला आणि तिच्या पतीला मानसोपचाराची सक्त गरज आहे’, असं एकाने लिहिलं. तर ‘तोंड लपवण्यासारखी कृत्ये करावीच कशाला’, असा टोमणा दुसऱ्या युजरने लगावला. ‘हा माणूस स्वत:चीच खिल्ली उडवतोय’, असंही नेटकऱ्यांनी म्हटलंय.
View this post on Instagram
राज कुंद्राने एकदा ट्विट करत मास्कमागे चेहरा लपवण्याचं कारण सांगितलं होतं. ‘मी लोकांपासून माझा चेहरा लपवत नाही. पण मला मीडियाने माझे फोटो किंवा व्हिडीओ क्लिक करावे अशी माझी अजिबात इच्छा नाही. मी ज्या मीडिया ट्रायलमधून गेलोय, त्यानंतर ही गोष्ट समजायला तुम्हाला कठीण जाणार नाही’, असं त्याने लिहिलं होतं. गेल्या वर्षी जुलै महिन्यात राज कुंद्राला पॉर्नोग्राफी प्रकरणात अटक झाली होती. दोन महिने तुरुंगात राहिल्यानंतर त्याची जामिनावर सुटका झाली.
