israel hamas war | भुयारं आमच्या सुरक्षेसाठी, हमास नेता म्हणाला, ‘UN ने करावी गाझाच्या नागरिकांची सुरक्षा’

तेल अवीव | 31 ऑक्टोबर 2023 : इस्रायल आणि हमासचे युद्ध सुरु आहे. आतापर्यंत गाझापट्टीत हवाई हल्ले करणाऱ्या इस्रायलने आता तेथे मैदानी लढाई करण्याची तयारी सुरु केली आहे. या युद्धात आता गाझापट्टीतील भुयारी मार्गांचा अडथळा इस्रायलच्या समोर आवासून आहे. या दरम्यान, आता हमासच्या एका नेत्याने गाझापट्टीत असलेल्या भुयारांचा उपयोग हमासच्या लढवय्ये त्यांच्या सुरक्षेसाठी करणार असून गाझापट्टीतील नागरिकांची जबाबदारी आता संयुक्त राष्ट्रांनी पाहावी अशी भूमिका घेतली आहे. दरम्यान, इस्रायलच्या कारवाईत आतापर्यंत आठ हजाराहून अधिक पॅलेस्टिनी नागरिकांचा मृत्यू झाल्याची माहीती गाझाच्या आरोग्य मंत्रालयाने दिली आहे.

रशिया टीव्ही टूडे या चॅनला दिलेल्या एका मुलाखतीत हमासच्या मूसा अबू मरजूक यांनी सर्वसामान्य जनतेला वाचविण्याची जबाबदारी संयुक्त राष्ट्र आणि इस्रायलची आहे. मिडील ईस्ट मिडीया रिसर्ट इन्स्टिट्यूट म्हणजे Memri टीव्ही तर्फे केलेल्या अनुवादानूसार मूसा यांनी गाझाच्या सर्वसामान्य नागरिकांच्या संरक्षणाची जबाबदारी युएन आणि इस्रायल यांची असे म्हटले आहे. मूसा याने म्हटले आहे की आम्ही टार्गेट होण्यापासून संरक्षणासाठी आणि स्वत:चा जीव वाचविण्यासाठी ही भुयारे तयार केली आहेत. ती हवाई हल्ल्यापासून वाचण्यासाठी आहेत. आमच्या जवळ भुयारातून लढण्याशिवाय दुसरा कोणताही मार्ग नसल्याचे मूसा याने मुलाखतीत म्हटले आहे. जिनिव्हा परिषदेतील करारानूसार जोपर्यंत ते कोणाच्या तावडीत आहेत, तोपर्यंत त्यांना सर्व सेवा आणि सुविधा पुरविण्याची जबाबदारी युएनची आहे.

उत्तर गाझाच्या आत पोहचले सैन्य

इस्रायली सैन्य आणि त्यांच्या चिलखती वाहनांनी सोमवारी उत्तर गाझापट्टीतील आतील भागात प्रवेश केला आहे. पॅलेस्टिनी भागात मैदानी कारवाई सुरु केल्याच्या तीन दिवसानंतर सोमवारी गाझापट्टीत दोन्ही बाजूंनी युद्धाला सुरुवात झाली आहे. इस्रायली सैन्य आणि रणगाड्यांनी गाझाच्या मुख्य उत्तर शहरावर पूर्व आणि पश्चिमेकडून हल्ला केला.

रुग्णालयाजवळ हल्ले

हॉस्पिटल आणि त्यांच्या शेजारी जेथे हजारो रुग्ण आणि नागरिकांनी आश्रय घेतला आहे तेथे इस्रायली सैनिक हल्ले करीत असल्याने संयुक्त राष्ट्र आणि आरोग्य कर्मचाऱ्यांनी सावध राहण्यास सांगितले आहे. इस्रायलचे सैन्य उत्तर गाझाच्या आतपर्यंत शिरले आहे. इस्रायल सैनिकांनी सोमवारी जारी केलेल्या व्हिडीओत चिलखती वाहने इमारतीच्या मधून जाताना दिसत आहेत. तसेच इस्रायली सैनिक काही घराच्या आता मोर्चा सांभाळताना दिसत आहेत.