Latur Crime : तीन मुलीनंतर जन्मला, लाडक्या मुलाला शिक्षणासाठी होस्टेलला पाठवलं, पण नियतीच्या मनात काही वेगळंच!

लातूर / 8 ऑगस्ट 2023 : सध्या पावसाळा सुरु असल्याने नदी, नाले, ओढे प्रवाहित झाले आहेत. यामुळे धरण परिसरत,धबधबे या ठिकाणी पर्यटकांचा ओघ वाढला आहे. तसेच शाळकरी मुलेही गावातील ओढे, डबके यात पोहण्याचा आनंद लुटत आहेत. मात्र यामुळे दुर्घटनांचे प्रमाण वाढले आहे. अशीच एक घटना लातूर जिल्ह्यातील रामेश्वर येथे घडली. आठवीत शिकणारा मुलगा मित्रांसोबत ओढ्यावर पोहायला गेला. मात्र पोहता येत नसल्याने तो ओढ्यात बुडाला. एकुलत्या एक मुलाच्या मृत्यूमुळे आई-वडिलांवर दुःखाचा डोंगर कोसळला आहे. मुलाच्या गावावरही शोककळा पसरली आहे.

शिक्षणासाठी मुलाला वसतिगृहात ठेवले होते

निलंगा तालुक्यातील काटेजवळगा येथे कैलास गंगणे हे आपल्या कुटुंबासह राहतात. गंगणे हे बांधकाम मजूर आहेत. गंगणे यांना तीन मुली एक मुलगा अशी चार मुले आहेत. तीन मुलींनंतर मुलगा झाल्याने तो लाडका होता. त्याला चांगले शिक्षण मिळावे म्हणून गंगणे यांनी मुलाला रामेश्वर येथील शाळेत शिकायला ठेवले होते. मुलगा इयत्ता आठवीत शिकत असून, तेथेच वसतिगृहात राहत होता.

मित्रांसोबत ओढ्यावर पोहायला गेला अन् बुडाला

मुलगा मित्रांसोबत शाळेजवळ असलेल्या ओढ्यावर पोहायला गेला. मात्र पाण्यात उडी घेतल्यानंतर ओढ्यातील गाळात फसला. त्याला बुडताना पाहून इतर तीन मुलांनी आरडाओरडा केला. मात्र मुलांचा आवाज ऐकून कुणी मदतीला येईपर्यंत मुलाचा बुडून मृत्यू झाला होता. मुलाच्या मृत्यूची बातमी कळताच आई-वडिल आणि नातेवाईकांनी एकच टाहो फोडला. एकुलत्या एक मुलाच्या जाण्याने कुटुंब शोकात बुडाले आहे. याबाबत गातेगाव पोलिसात मृत्यूची नोंद करण्यात आली असून, पुढील तपास पोलीस करीत आहेत.