‘पेट्रोलचे दर स्वत:च्या जबाबदारीवर पाहा, छातीत कळ आल्यास मालक जबाबदार नाही!’, पंपावरील मेसेज तुफान व्हायरल

कोल्हापूर : सध्या इंधन दरवाढीमुळे सर्वसामान्य नागरिक पुरता हैराण झालाय. पेट्रोल आणि डिझेलचे दर रोज वाढत आहेत. इंधन दरवाढीला यूपीए सरकार जबाबदार असल्याचा सूर पुन्हा एकदा भाजपनं आळवलाय. त्यावरुन काँग्रेस नेत्यांनीही भाजपवर जोरदार टीका करायला सुरुवात केली आहे. अशास्थितीत काही लोकांची क्रिएटिव्हिटी चांगलीच समोर यायला लागली आहे. कोल्हापुरातील एका पेट्रोल पंपावरील अशीच एक क्रिएटिव्हिटी चांगलीच व्हायरल होत आहे.(Message on fuel price hike at a petrol pump in Kolhapur)

‘पेट्रोलचे दर स्वत:च्या जबाबदारीवर पाहावेत, छातीत कळ आल्यास पंप मालक जबाबदार राहणार नाही’, असा एक मेसेज कोल्हापुरातील एका पेट्रोल पंपावरील फलकावर लिहिण्यात आला होता. येणारा जाणारा प्रत्येक माणूस तो मेसेज पाहत होता आणि हसून पुढे जात होता. ग्राहकांसाठी लिहिलेल्या या खास मेसेजचा व्हिडीओ सध्या सोशल मीडियावर चांगलाच गाजतो आहे. दरम्यान हा खोडसाळपणा पेट्रोल पंपावर नवीन कामाला आलेल्या कर्मचाऱ्याने केल्याचं स्पष्टीकरण संबंधित पंप मालकाने दिलं आहे. त्याच्या या मेसेजशी आम्ही सहमत नसल्याचंही त्यांनी म्हटलंय.

पेट्रोल-डिझेलच्या दरात सातत्याने वाढ

पेट्रोल आणि डिझेलच्या दरांमध्ये (Petrol Diesel Price Today) सातत्याने वाढ होत आहे. ऐन महागाईत गेल्या काही दिवसांपासून पेट्रोल आणि डिझेलचे वावही वाढत आहे. आजही देशातल्या अनेक भागांमध्ये शंभरच्या पार इंधन पोहोचलं आहे. आज पेट्रोल डिझेलच्या दरात 34 पैशांपेक्षा वाढलं आहे.

खरंतर, तेल कंपन्या रोज पेट्रोल आणि डिझेलचे नवीन दर जारी करतात. त्यानुसार आज सलग दहाव्या दिवशी ही वाढ झाली आहे. राजस्थानच्या श्रीगंगानगरमध्ये तर पेट्रोलची किंमत प्रतिलिटर 100 रुपयांच्या पुढे गेली आहे. दिल्लीत 34 पैसे वाढीसह 89.88 वर पोचलं तर मुंबईतील पेट्रोलची किंमत प्रतिलिटर 96.32 रुपयांवर पोहोचली आहे. म्हणजेच मेट्रो शहरांमध्ये इंधनाच्या किंमती वाढल्याचं पाहायला मिळालं आहे.

प्रमुख शहरांमधील पेट्रोलचे दर

नवी दिल्ली (Delhi Petrol Price Today) : 89.88 रुपये प्रति लिटर

मुंबई (Mumbai Petrol Price Today): 96.32 रुपये प्रति लिटर

कोलकाता (Kolkata Petrol Price Today): 91.11 रुपये प्रति लिटर

पुणे (Pune Petrol Price Today) : 95.95 रुपये प्रति लिटर

प्रमुख शहरांमधील डिझेलचे भाव

नवी दिल्ली (Delhi Diesel Price Today) : 80.27 रुपये प्रति लिटर

मुंबई (Mumbai Diesel Price Today) : 87.32 रुपये प्रति लिटर

कोलकाता (Kolkata Diesel Price Today) : 83.86 रुपये प्रति लिटर

पुणे (Pune Diesel Price Today) : 85.63 रुपये प्रति लिटर

संबंधित बातम्या :

परभणीत देशातील सर्वात महाग इंधन, पेट्रोल 98 रुपयांच्या पार, वाहनचालक त्रस्त

पेट्रोल आणि डिझेलच्या किमतीनं शंभरी गाठली, पुण्यात काँग्रेसचं मोदी सरकारविरोधात आंदोलन

Message on fuel price hike at a petrol pump in Kolhapur