Aryan Khan case : आर्यन खानला पासपोर्ट परत द्या, स्पेशल कोर्टाचे एनसीबीला आदेश
दीड महिन्यापूर्वी आर्यनला या प्रकरणात क्लीन चिट मिळाली. पुढे आर्यन खानने पासपोर्ट (Passport) परत मिळवण्यासाठी याचिका दाखल केली होती. त्यानंतर न्यायालयाने एनसीबीला उत्तर दाखल करण्याचे निर्देश दिले होते. अखेर आज स्पेशल कोर्टाने एनसीबीला आर्यन खानचा पासपोर्ट परत करण्याचे आदेश दिले आहेत.
मुंबई : बॉलिवूड अभिनेता शाहरुख खानचा मुलगा आर्यन खानला (Aryan Khan) ड्रग्स प्रकरणात क्लीन चिट मिळाली आहे. त्यानंतर 1 जुलै रोजी आर्यन खानने विशेष एनडीपीएस कोर्टासमोर याचिका दाखल केली होती. त्यात त्याने पासपोर्ट परत करण्याची मागणी केली होती. आर्यन खानला मागील वर्षी क्रूझ ड्रग्स प्रकरणात (Drugs Case) नार्कोटिक्स कंट्रोल ब्यूरो अर्थात एनसीबीने अटक केली होती. साधारण दीड महिन्यापूर्वी आर्यनला या प्रकरणात क्लीन चिट मिळाली. पुढे आर्यन खानने पासपोर्ट (Passport) परत मिळवण्यासाठी याचिका दाखल केली होती. त्यानंतर न्यायालयाने एनसीबीला उत्तर दाखल करण्याचे निर्देश दिले होते. अखेर आज स्पेशल कोर्टाने एनसीबीला आर्यन खानचा पासपोर्ट परत करण्याचे आदेश दिले आहेत.
जामिनाच्या अटींवर पासपोर्ट जमा
एनसीबीने आर्यन खान आणि इतर पाच जणांना पुरेशा पुराव्याअभावी क्लिन चिट दिली. आर्यन खानने जामिनाच्या अटींनुसार कोर्टात पासपोर्ट सादर केला होता. गुरुवारी त्याने त्याच्या वकिलांच्या मार्फत विशेष कोर्टात याचिका दाखल केली. ज्यामध्ये त्याचं नाव नसलेल्या आरोपपत्राचा हवाला देत पासपोर्ट परत करण्याची मागणी केली होती.
क्रूझ ड्रग्स प्रकरणात आर्यन खानला क्लीन चिट
कॉर्डेलिया क्रूझवरील ड्रग्ज प्रकरणी 27 मे रोजी नार्कोटिक्स कंट्रोल ब्युरोने अभिनेता शाहरुख खानचा आर्यन खान आणि इतर पाच जणांना दोषमुक्त केलं. गेल्या वर्षी 2 ऑक्टोबर रोजी मुंबईतील कॉर्डेलिया क्रूझवर एनसीबीने छापा टाकला होता. याप्रकरणी आता 14 जणांविरुद्ध आरोपपत्र दाखल करण्यात आलं आहे. आर्यनकडे कोणतेही ड्रग्ज सापडले नसल्याचं आरोपपत्रात नमूद करण्यात आलं. एनसीबीने क्रूझवर छापा टाकल्यानंतर आर्यनसह इतर सहा जणांना अटक केली होती. आर्यनने जवळपास एक महिना तुरुंगात घालवला होता. एनसीबीकडून या प्रकरणाची सखोल चौकशी सुरू होती. आर्यनला या प्रकरणात गोवण्यात आलं असावं आणि पैसे उकळण्याचा प्रयत्न केला गेला असावा, असा आरोपही झाले. त्यानंतर या प्रकरणाचा तपास विशेष तपास पथकाकडे (एसआयटी) वर्ग करण्यात आला होता.
