Ajit Pawar : उद्धव ठाकरेंसोबत उभं राहण्यावर ठाम, सायंकाळी मुख्यमंत्र्यांना भेटणार; अजित पवारांची पुन्हा घोषणा
कोरोनाच्या काळात जे कार्यक्रम घेतले गेले, ते त्यांच्या नेतृत्वात झाले. राज्यात जी काही कामे आहेत, ती त्यांच्या नेतृत्वात करून राज्याला पुढे नेण्याचे काम त्यांनी केले. त्यामुळे आताच्या परिस्थितीतही राष्ट्रवादी उद्धव ठाकरे यांच्या सोबत आहे, असे अजित पवार म्हणाले.
मुंबई : शिवसेना नेते एकनाथ शिंदे (Eknath Shinde) यांच्या बंडाच्या पार्श्वभूमीवर आम्ही मुख्यमंत्री उद्धव ठाकरे यांच्यासोबत उभे राहण्यावर ठाम आहे, असे मत उपमुख्यमंत्री अजित पवार (Ajit Pawar) यांनी व्यक्त केले आहे. ते मुंबईत बोलत होते. आज संध्याकाळी 6 वाजता मुख्यमंत्री उद्धव ठाकरे यांना भेटायला जाणार आहे, असेही अजित पवार म्हणाले आहेत. यावेळी त्यांच्यासोबत मंत्री जयंत पाटील, प्रफुल्ल पटेल हेदेखील असणार आहेत. दरम्यान विधीमंडळचे काही निर्णय असतील तर विधीमंडळाचे उपसभापती घेणार, अशी माहिती त्यांनी दिली. बंडखोरी हा शिवसेनेतील (Shivsena) अंतर्गत प्रश्न आहे. ते आमदार माझ्या पक्षातील नाहीत, त्यामुळे त्यांना सल्ला किंवा त्यावर त्यावर भाष्य करणे योग्य नाही, अशी प्रतिक्रिया अजित पवार यांनी यावेळी दिली.
‘उद्धव ठाकरेंच्या नेतृत्वात काम’
मागील अडीच वर्षांपासून उद्धव ठाकरे मुख्यमंत्री पदावर आहेत. सर्वांना सोबत घेऊन ते काम करीत आहेत. वेगवेगळ्या राज्यांची मुख्यमंत्र्यांची यादी जेव्हा जायची तेव्हा महाराष्ट्राच्या मुख्यमंत्र्यांचा तिसरा, चौथा, पाचवा असा क्रमांक यायचा. ते क्रमांक आम्ही देत नव्हतो. कोरोनाच्या काळात जे कार्यक्रम घेतले गेले, ते त्यांच्या नेतृत्वात झाले. राज्यात जी काही कामे आहेत, ती त्यांच्या नेतृत्वात करून राज्याला पुढे नेण्याचे काम त्यांनी केले, याविषयी ते मार्गदर्शन करतात. त्यामुळे आताच्या परिस्थितीतही राष्ट्रवादी उद्धव ठाकरे यांच्यासोबत आहे, असे ते म्हणाले.
‘मुख्यमंत्र्यांचे अजिबात दुर्लक्ष नाही’
काँग्रेस आणि राष्ट्रवादीला सांभाळण्याच्या नादात शिवसेनेच्या आमदारांकडे मुख्यमंत्र्यांचे दुर्लक्ष झाले का, असे विचारले असता अजिबात नाही, असे उत्तर त्यांनी दिले. सुरुवातीचे काही दिवस मुख्यमंत्र्यांनी वर्षावरून काम पाहिले. त्यावेळी कामामध्ये कुठलाही अडथळा आला नाही. आताही ते तेथून कारभार करत असतील तर काहीच अडचण नाही. दरम्यान, शिवसेनेच्या बंडखोर आमदारांबद्दल माझ्याकडे काहीही माहिती नाही आणि ऐकीव बातम्यांवरून मी मत व्यक्त करत नाही, असे अजित पवार म्हणाले.
काय म्हणाले अजित पवार?
