Marathi News Maharashtra Mumbai Sadabhau khot protest against milk price fall in maharashtra

दुधाचा कॅन खांद्यावर घेऊन सदाभाऊ खोत मंत्रालयाकडे; दूध दरवाढीसाठी अनोखं आंदोलन

टीव्ही 9 मराठी डिजीटल टीम | Updated on: Jun 10, 2021 | 2:24 PM

कोरोनाच्या संकटामुळे शेतकऱ्यांचं कंबरडं मोडलं आहे. त्यातच दुधाचे दर कमी झाल्यामुळे शेतकऱ्यांच्या जखमेवर मीठ चोळलं गेलं आहे. त्यामुळे दूध दरवाढ मिळावी म्हणून रयत क्रांती संघटनेने आज अनोखं आंदोलन केलं.

दुधाचा कॅन खांद्यावर घेऊन सदाभाऊ खोत मंत्रालयाकडे; दूध दरवाढीसाठी अनोखं आंदोलन

sadabhau khot

मुंबई: कोरोनाच्या संकटामुळे शेतकऱ्यांचं कंबरडं मोडलं आहे. त्यातच दुधाचे दर कमी झाल्यामुळे शेतकऱ्यांच्या जखमेवर मीठ चोळलं गेलं आहे. त्यामुळे दूध दरवाढ मिळावी म्हणून रयत क्रांती संघटनेने आज अनोखं आंदोलन केलं. संघटनेचे नेते सदाभाऊ खोत यांनी स्वत: दुधाचा कॅन खांद्यावर घेऊन हे आंदोलन केलं. खोत आणि आंदोलक दुधाची कॅन खांद्यावर घेऊन मंत्रालयाच्या दिशेने आल्याने पोलिसांची एकच पळापळ झाली. यावेळी खोत यांचा मोर्चा मध्येच अडवण्यात आला. त्यामुळे आंदोलकांनी जोरदार घोषणाबाजी करत सरकारचा निषेध नोंदवला. (sadabhau khot protest against milk price fall in maharashtra)

आज सकाळी रयत क्रांती संघटनेचे नेते सदाभाऊ खोत आणि आंदोलकांनी दुधाच्या कॅन खांद्यावर घेऊन मंत्रालयाकडे निघाले. यावेळी ‘दुधापेक्षा पाणी महाग, आघाडी सरकारला कधी येणार जाग’, अशा घोषणा यावेळी देण्यात आल्या. त्यामुळे मंत्रालय परिसर दणाणून गेला. त्यामुळे पोलिसांनी तात्काळ घटनास्थळी धाव घेऊन खोत यांचा मोर्चा मध्येच अडवला. यावेळी खोत यांनी आघाडी सरकारवर जोरदार टीका केली. यावेळी खोत यांनी दुग्धविकास विभागाचे सचिव अनुपकुमार यांची मंत्रालयामध्ये भेट घेतली. यावेळी शेतकऱ्यांना दिलासा देण्याचे सचिवांनी आश्वासन दिल्याचं खोत म्हणाले.

खासगी कंपन्यांवर कारवाई करा

आज महाराष्ट्रात अनेक ठिकाणी गाईच्या दुधाला 18 ते 20 रुपयांपर्यंत प्रति लिटर भाव मिळत आहे. राज्य सरकारच्या परिपत्रकानुसार 3/5 फॅट व 8/5 एसएनएफ नुसार किमान 25 रुपये प्रति लिटर दर देणे आवश्यक आहे, परंतु या आदेशाला सहकारी व खासगी दूध संस्थाकडून केराची टोपली दाखवण्यात येत आहे. मात्र दुसरीकडे दुधाला कमी भाव देणाऱ्या दूध संस्था व खाजगी कंपन्यांवर कोणतीही कारवाई करण्याचे काम दुग्ध विकास विभागाकडून होत नाही. इतकंच नाही तर खाजगी दूध संस्थावर व खाजगी कंपन्यांवर कारवाई करण्याचे अधिकार नसल्याचे सांगण्यात येत आहे, असं खोत म्हणाले.

दुधालाही एमएसपी किंवा एफआरपी असावी

ज्याप्रमाणे ऊस उत्पादक आणि साखर कारखाने यांच्यामध्ये ऊसासाठी किमान आधारभूत किंमत FRP आहे. त्याच धर्तीवर दुधालाही FRP किंवा MSP मिळावी. महाराष्ट्रातील दूध उत्पादकांना समान भाव देणे गरजेचे आहे. ऊसासाठी रंगराजन समितीच्या शिफारसीनुसार 70/30 चा फॉर्म्युला आहे. त्याप्रमाणे दूध उत्पादकांसाठी किमान 85/15 चा फॉर्म्युला करणे गरजेचे आहे. सध्या कोल्हापूरमधील गोकुळ दूध संघामध्ये 81/19 चा फॉर्म्युला कार्यरत आहे. 1966-67 नंतर संकरीकरणाचा तंत्रज्ञान युक्त वापर दिसत नाही. गिर, धारपारकर हे आमचे गायी ब्रीड जागतिक आदर्शवत आहेत, या जातींच्या गायींचे संगोपन होणे गरजेचे आहे. दुधाला भाव नसल्यामुळे महाराष्ट्रात अनेक दूध उत्पादकांनी आत्महत्या केल्या आहेत. किमान राज्य सरकारने जाहीर केलेल्या दराप्रमाणे दूध उत्पादकांना भाव मिळणे गरजेचे आहे, अशी मागणीही त्यांनी केली. (sadabhau khot protest against milk price fall in maharashtra)