Rajya Sabha Election: लाल बावट्यानेही दिला भगव्याला पाठिंबा; माकपच्या विनोद निकोलेंसह अपक्षांमुळे ‘मविआ’चे पारडे जड

मुंबईः राज्यसभेच्या (Rajysabha Elecation) निवडणुकीच्या पार्श्वभूमीवर मुंबईत आज ट्रायडंट हॉटेलवर महाविकास आघाडीची (Mahavikas Aghadi) आज बैठक घेण्यात आली. या बैठकीला चर्चेचा विषय ठरला आहे ती गोष्ट म्हणजे 12 अपक्ष आमदारांची उपस्थिती. या बैठकीला काँग्रेस, राष्ट्रवादी आणि शिवसेनेचे सर्व आमदार उपस्थित होते. विशेष म्हणजे या बैठकीला महाविकास आघाडीला पाठिंबा देणारे 12 अपक्ष आमदार उपस्थित राहिले. त्यामुळे आघाडीला जोरदार पाठिंबा मिळाला आहे. त्यामुळे साहजिकच आता महाविकास आघाडीचे पारडे जड झाले आहे.

मार्क्सवादी कम्युनिस्ट पक्षाचे विनोद निकोले (Marxist Communist Party MLA Vinod Nikole) यांनीही महाविकास आघाडीला पाठिंबा दर्शविला आहे. महाविकास आघाडीला पाठिंबा देताना त्यांनी सांगितले की, महाविकास आघाडी सरकारला माझा पाठिंबा आहे.

कामगार शेतकरी यांच्याविरोधात धोरणं

गेल्या पाच ते सात वर्षात केंद्रात जे सरकार आहे. त्यांनी कामगार शेतकरी यांच्याविरोधात धोरणं राबविण्यात आली आहेत. त्यामुळे या चुकीच्या धोरणांमुळे आपण महाविकास आघाडी सरकारला पाठिंबा देत असल्याचेही त्यांनी सांगितले.

भाजपकडून जो खासगीकरणाचा सपाटा

तसेच यावेळी पालघरच्या डहाणूचे आमदार विनोद निकोले यांनी सांगितले की, मागील वर्षी शेतकऱ्यांनी दिल्लीत आंदोलन पुकारले. ते आंदोलन दीर्घ काळ चालले होते, मात्र त्या आंदोलनातील शेतकऱ्यांची केंद्र सरकारने त्यांची फरफट केली. तसेच देशात भाजपकडून जो खासगीकरणाचा सपाटा लावण्यात आला आहे, त्याला विरोध म्हणून मी महाविकास आघाडीला पाठिंबा देत असल्याचेही आमदार विनोद निकोले यांनी सांगितले.

केंद्रातील सरकारने देशात सर्वत्र खासगीकरणाचा घाट घातला आहे. त्यामुळे राज्यातील महाविकास आघाडीला पाठिंबा देऊन राज्यसभेला आपण पाठिंबा देत असल्याचे माकपचे आमदार विनोद निकोले यांनी सांगितले.