Nashik Rain Update : नाशिकच्या इगतपुरीमध्ये पावसाची जोरदार ‘बरसात’, 24 तासात 132 मिमी पावसाची नोंद
Nashik Rain Update : इगतपुरी तालुक्यात सर्वत्र जोरदार पाऊस पड़त आहे. 6 दिवसांत एकूण 721 मिमी तर गेल्या 24 तासांत 132 मिमी पाऊस पडला आहे.
इगतपुरी, नाशिक : सुरुवातीला जून महीना कोरडा गेल्यानंतर जवळपास महिनाभरापासून पावसाची (Nashik Rain Update) अक्षरशः चातकाप्रमाणे वाट बघणा-या बळीराजाला आपला खरीप हंगाम वाया जातो की काय अशी भीती सुरुवातीला वाटत होती. मात्र 6 दिवसांपासून इगतपुरी तालुक्यात सर्वत्र जोरदार पाऊस पडत आहे. यावर्षी महीनाभराची तूट 6 दिवसांत पावसाने भरुन काढली आहे. 6 दिवसांत एकूण 721 मिमी तर गेल्या 24 तासांत 132 मिमी पाऊस पडला आहे. तालुक्यातील सहा मंडल विभागात सर्वत्र जलमय स्थिती असून सार्वजनिक मालमत्तेचे देखील मोठे नुकसान झाले आहे.अनेक ठिकाणी रस्ते, मो-या वाहून गेल्याने संपर्क तुटलेले आहे. इगतपुरी तालुक्यात आजपर्यंत एकूण सुमारे 1266 मिमी पाऊस झाला. गतवर्षीच्या तुलनेने यावर्षी जास्त पाऊस बरसत आहे. या पावसाने ब्रिटिशकालीन दारणा धरण 68 टक्के भरले असुन भावली धरणात ही दारणाच्या बरोबरिने पाण्याची आवक वाढत आहे. भावलीत (Bhavali Dam) 65 टक्के पाणी आले होते.
गेल्या 6 दिवसांपासून सुरु असलेली संत्ततधारेमुळे बळीराजा सुखावला आहे. वाया जाणारा खरीप हंगाम पांडुरंगच्या कृपेने तरला असुन सर्वत्र भात लागवडी वेगात सुरु झाल्या आहेत. सह्याद्रीच्या घाटमाथ्यावर कालपासून दिवसभर पावसाने मुसळधार रुप धारण केले होते. आज सकाळी 6 पर्यंत गेल्या 24 तासात इगतपूरी येथे 132 मिमी पावसाची नोंद झाली आहे आज दिवसभर मुसळधार पाऊस पडत होता. तालुक्यातील इगतपुरी,घोटी, वैतरणा (धारगाव), खेड, टाकेद,वाडीव-हे,नांदगाव बु मंडळ विभागात आज मुसळधार पाऊस होत आहे. सह्यद्रिच्या घाटमाथा परिसराला पावसाने अक्षरश: झोडपून काढले आहे. त्यामुळे रखडलेल्या भाताच्या लावण्या जोरात सुरु आहेत. पावसामुळे बळीराजा सुखावला असुन सर्वत्र समाधान व्यक्त होतेय.
धरणातील जलसाठा आणि पाऊस आकडेवारी
- दारणा : 67.21 टक्के
- मुकणे : 50.56
- वाकी : 9.87
- भाम : 46.06
- भावली : 64.92
- कडवा : 68.90
आजचा पाऊस : 132 मिमी
एकूण पाऊस : 1266 मिमी
दारणातून विसर्ग : 4113 क्यूसेस
