Rohit Pawar | आमदार रोहित पवार यांच्या कंपनीवर मध्यरात्री कारवाई, मध्यरात्रीच कशामुळे झाली कारवाई?
MLA Rohit Pawar | आमदार रोहित पवार यांच्या कंपनीवर मध्यरात्री कारवाई झाली आहे. या कारवाईमुळे राजकीय गटात खळबळ उडाली आहे. स्वत: रोहित पवार यांनी एक्सवर या कारवाईसंदर्भातील महिती देत काही प्रश्न उपस्थित केले.
पुणे | 28 सप्टेंबर 2023 : राष्ट्रवादी काँग्रेसचे शरद पवार गटातील आमदार रोहित पवार यांच्या कंपनीवर बुधवारी मध्यरात्री कारवाई झाली. या कारवाईची माहिती स्वत: रोहित पवार यांनी X वर (ट्विटर) दिली. रोहित पवार यांनी या कारवाई संदर्भात दोन राजकीय नेत्यांचा उल्लेख केला आहे. नाव न घेता त्यांनी या राजकीय नेत्यांमुळे ही कारवाई झाली असल्याचे म्हटले आहे. दरम्यान, मध्यरात्री झालेल्या या कारवाईमुळे राजकीय क्षेत्रात आश्चर्य व्यक्त होत आहे.
कोणत्या कंपनीवर झाली कारवाई
आमदार रोहित पवार यांची बारामती ॲग्रो ही कंपनी आहे. या कंपनीच्या बारामती येथील प्लॅन्टवर महाराष्ट्र प्रदूषण नियंत्रक मंडळाने कारवाई केली. प्रदूषण मंडळाकडून रात्री २ वाजता आमदार रोहित पवार यांना नोटीस देण्यात आली आहे. या नोटिशीत बारामती ॲग्रो या कंपनीचा प्लॅन्ट ७२ तासांत बंद करण्याच्या सूचना दिल्या आहेत. त्यामुळे राजकीय क्षेत्रात खळबळ उडाली आहे.
काय म्हणतात रोहित पवार
आमदार रोहित पवार यांनी सोशल मीडियावर या कारवाईची माहिती दिली. त्यात त्यांनी म्हटले आहे की, दोन मोठ्या नेत्यांच्या सांगण्यावरून ही कारवाई झाली आहे. द्वेष मनात ठेवून एका शासकीय विभागाच्या माध्यमातून माझ्या कंपनीवर पहाटे दोन वाजता कारवाई झाली. एखादी भूमिका घेताना अनेक अडचणींचा सामना करावा लागतो, हे माझ्या युवा मित्रांना सांगू इच्छितो. मी घेतलेल्या भूमिकेमुळे ही कारवाई होत आहे. परंतु अशा काही अडचणी आल्या तर मी संघर्ष थांबवेल, असे नाही. मराठी माणसाचे वैशिष्ट म्हणजे ते भूमिका बदल नाही. माझ्या लढा सुरुच राहणार आहे.
राज्यातील दोन मोठ्या नेत्यांच्या सांगण्यावरून कुठला तरी द्वेष मनात ठेवून आज पहाटे दोन वाजता राज्य शासनाच्या एका शासकीय विभागाच्या माध्यमातून माझ्या कंपनीच्या एका विभागावर कारवाई करण्यात आली.
युवा मित्रांना एकच सांगू इच्छितो की, संघर्ष करतांना भूमिका घेताना अनेक अडचणींचा सामना…
— Rohit Pawar (@RRPSpeaks) September 28, 2023
वाढदिवसाआधी कारवाई
रोहित पवार यांचा २९ सप्टेंबर रोजी वाढदिवस आहे. त्याचा एक दिवस आधी ही कारवाई झाली आहे. त्यावर रोहित पवार यांनी म्हटले आहे की, माझ्या वाढदिवसानिमित्त ‘गिफ्ट’ दिल्याबद्दल सरकारचे आभार मानतो. आता जनता सरकारला ‘रिटर्न गिफ्ट’ देणार, याची मला खात्री आहे.
दरम्यान रोहित पवार यांनी दोन राजकीय नेत्यांचा उल्लेख केला आहे. परंतु त्यांची नावे घेतली नाही. हे दोन राजकीय नेते कोण? हे नेते पुणे जिल्ह्यातील आहे की बाहेरील? यासंदर्भात आता तर्कवितर्क लढवले जात आहे.
