Congress protest : देशात हिटलरशाही सुरू असल्याचा आरोप करत पुण्यात काँग्रेसचं आंदोलन; राहुल गांधींच्या ईडीच्या चौकशीचा निषेध
काँग्रेस नेते आक्रमक झाले आहेत. महाराष्ट्रात पुण्यामध्ये काँग्रेसकडून आज जोरदार आंदोलन करण्यात आले. त्यावेळी आंदोलनात सहभागी पुणे काँग्रेसच्या नेत्यांनी केंद्र सरकार तसेच पंतप्रधान नरेंद्र मोदी यांच्यावर जहरी टीका केली.
पुणे : पुण्यात काँग्रेसचे आज आंदोलन (Congress protest) होत आहे. राहुल गांधी यांच्या ईडी चौकशीच्या विरोधात पुण्यात काँग्रेस आक्रमक झाली आहे. जिल्हाधिकारी कर्यालयासमोर काँग्रेसचे आंदोलन पाहायला मिळाले. राहुल गांधी यांची चौकशी सूडबुद्धीने होत असल्याचा आरोप काँग्रेसने केला आहे. राहुल गांधी यांनी सरकारच्या विरोधात आवाज उठवला, म्हणून ही कारवाई होत असल्याचा काँग्रेसने आरोप केला आहे.नॅशनल हेराल्ड केस (National Herald case) प्रकरणात काँग्रेसचे माजी अध्यक्ष आणि खासदार राहुल गांधी यांची चौकशी सुरू आहे. 13 जूनपासून राहुल गांधी (Rahul Gandhi) यांची चौकशी सुरू आहे. त्यामुळे काँग्रेस नेते आणि कार्यकर्ते रस्त्यावर उतरले आहेत. दरम्यान, सोनिया गांधी यांच्या प्रकृतीमुळे पुढचे तीन दिवस राहुल गांधी यांची चौकशी पुढे ढकलण्यात आली आहे.
केंद्र सरकारवर टीका
नवी दिल्लीसह विविध राज्यात काँग्रेसकडून जोरदार आंदोलन करण्यात येत आहे. काँग्रेस नेते आक्रमक झाले आहेत. महाराष्ट्रात पुण्यामध्ये काँग्रेसकडून आज जोरदार आंदोलन करण्यात आले. त्यावेळी आंदोलनात सहभागी पुणे काँग्रेसच्या नेत्यांनी केंद्र सरकार तसेच पंतप्रधान नरेंद्र मोदी यांच्यावर जहरी टीका केली. देशात हिटलरशाही सुरू आहे. घटनेनुसार कारभार होत नाही. राहुल गांधींना बदनाम करण्याचे षडयंत्र रचले जात आहे. कोणताही घोटाळा नसून विनाकारण राहुल गांधींच्या मागे ससेमिरा लावला जात आहे, असा आरोप काँग्रेस नेत्यांकडून यावेळी करण्यात आला. प्रणिती शिंदे, विश्वजित कदम यासह मोठ्या प्रमाणात काँग्रेस नेते आंदोलनात सहभागी झाले होते.
तीन दिवस चौकशी नाही
सोनिया गांधी यांना कोरोनाचा संसर्ग झाला. 12 जूनपासून त्या रुग्णालयात दाखल आहेत. त्यांना दिल्लीतील सर गंगाराम रुग्णालयामध्ये दाखल करण्यात आले आहे. त्या आजारी असल्यामुळे ईडीच्या चौकशीसाठी उपस्थित राहता येणार नाही, अशी विनंती राहुल गांधी यांच्यातर्फे करण्यात आली होती. ईडीनेही ती मान्य केली आहे. गुरूवारी राहुल गांधी यांची ईडी चौकशी करण्यात आली, त्यानंतर राहुल गांधी यांनी आपल्या आईच्या प्रकृतीचे कारण देत नॅशनल हेराल्ड प्रकरणी सुरू असलेली चौकशी 17 जून ते 20 जून या कालावधीत पुढे ढकलण्याची विनंती ईडीला केली होती.
