अजित पवार की शरद पवार? पुणे शहर राष्ट्रवादीने घेतला निर्णय
Ajit Pawar and Sharad Pawar : राष्ट्रवादी काँग्रेसमध्ये अजित पवार यांनी रविवारी बंड पुकारले. त्यानंतर अनेक ठिकाणी दोन गट निर्माण झाले. कोणाबरोबर जावे, यावर बैठका सुरु आहेत. आता पुणे शहर राष्ट्रवादी काँग्रेसने आपला निर्णय घेतला आहे.
योगेश बोरसे, पुणे : राज्यातील राजकारणात राष्ट्रवादी काँग्रेसमध्ये रविवारी दोन गट तयार झाले. राष्ट्रवादी काँग्रेसचे नेते अजित पवार यांनी आपला वेगळा गट तयार केला. त्यानंतर आपल्या गटातील काही आमदारांसह ते राजभवनावर पोहचले. अजित पवार यांच्यासोबत नऊ जण शिंदे-फडणवीस सरकारमध्ये मंत्री झाले. राष्ट्रवादी काँग्रेसमधील या घडामोडीनंतर शरद पवार मैदानात उतरले. त्यांनी राज्याचा दौरा करुन पक्षबांधणी करण्याची घोषणा केली. त्यावेळी पुणे शहर राष्ट्रवादी काँग्रेसची बैठक झाली. या बैठकीत कोणत्या गटात जावे? यासंदर्भात निर्णय घेण्यात आला आहे.
काय घेतला निर्णय
राष्ट्रवादी काँग्रेसच्या बैठकीत पक्षात फूट पाडणाऱ्या भाजप आणि राष्ट्रीय स्वयंसेवक संघाचा निषेध करण्यात आला. तसेच या काळात शरद पवार यांच्यासोबत राहण्याचा शहर कार्यकारीणीत ठराव करण्यात आला. आपण सगळे पवार साहेबांसोबत आहोत, असे राष्ट्रवादी काँग्रेसचे शहराध्यक्ष प्रशांत जगताप यांनी सांगितले.
मुंबईतील बैठकीला जाणार
राष्ट्रवादी काँग्रेसची प्रदेश बैठक मुंबईत ५ जुलै रोजी होणार आहे. या बैठकीला आपण जाणार आहोत. सकाळी १० पर्यत मुंबईत पोहचा अन् पुणे शहर पवार यांच्यासोबत आहे, हे दाखवून द्या, असे प्रशांत जगताप यांनी सांगितले. आपण कायदेशीर लढाई लढत आहोत. त्यामुळे प्रतीज्ञापत्र आलेले आहेत, ते घेऊन जा, असे प्रशांत जगताप यांनी पदाधिकाऱ्यांना सांगितले.
अजित पवार यांच्यावर टीका नको
अजित पवार किंवा इतर नेत्यावर कुठलेही आरोप किंवा टीका करू नका. सुप्रिया सुळे यांनीही आपल्या वक्तव्यात टीका केली नाही. सोशल मिडियावरून आपल्या काही संदेश द्यायचे असतील तर ते अधिकृतरित्या पाठवण्यात येतील. यामुळे अफवांवर विश्वास ठेवू नका, असे प्रशांत जगताप यांनी सांगितले.
बैठकीला २३ माजी नगरसेवक
राष्ट्रवादी काँग्रेसच्या बैठकीत 23 माजी नगरसेवक उपस्थित होते. पुणे येथील राष्ट्रवादीचे कार्यालयाचा करार माझ्या नावाने आहे, त्यामुळे कार्यालयाचा ताबा घेण्याचा प्रश्नच येत नाही. कार्यालयाचा ताबा कुणी घेणार नाही, घेतला तर मला पोलीस तक्रार देण्याचा अधिकार आहे, असे प्रशांत जगताप यांनी सांगितले. कार्यालयातील अजित पवार यांचा फोटो हटवण्यासंदर्भात जयंत पाटील ज्या सूचना देतील, त्यानुसार कारवाई केली जाणार असल्याचे त्यांनी सांगितले.
