VIDEO | ‘परवानगीविना फोटो कसे घेता?’ महिला अधिकाऱ्याचा प्रश्न, पुण्यात मनसे नगरसेवकाने झापलं
छोट्या-छोट्या कोव्हिड सेंटरलाही रेमडेसिव्हीर इंजेक्शन मिळालीच पाहिजेत, अशी मागणी वसंत मोरेंनी केली (Pune Vasant More ruckus Remdesivir )
पुणे : पुण्यातील मनसे नगरसेवक वसंत मोरे (Vasant More) यांनी रेमडेसिव्हीर इंजेक्शनवरुन राडा केला. छोट्या-छोट्या कोव्हिड सेंटरलाही रेमडेसिव्हीर इंजेक्शन मिळालीच पाहिजेत, अशी मागणी मोरेंनी केली. या घटनेचं लाईव्ह वसंत मोरे यांनी स्वतःच्या फेसबुक अकाऊण्टवरुन केलं. ‘परवानगीविना फोटो कसे घेता?’ असा प्रश्न विचारणाऱ्या महिला अधिकाऱ्यालाच मोरेंनी झापलं (Pune MNS Corporator Vasant More ruckus over Remdesivir injection to COVID Centers)
“हे लोकं चुका करणार… आज या डॉक्टरांकडची परिस्थिती ऐका… रेमडेसिव्हीर इंजेक्शन नाही म्हणून रोज आठ ते दहा पेशंट शिफ्ट करावे लागत आहेत. बाहेरच्यांना बेड मिळत नाहीत. आम्ही बोलायला गेलो की अधिकारी टेबलवरुन उठून जातात. आम्ही आमच्या घरच्यांसाठी मागतोय काय? कुठवर जीआर दाखवणार? आमची लोकं मरायला लागलीत तरी? एक नगरसेवक काम करतोय, तर त्याला सपोर्ट करायचा सोडून तुम्ही त्याला बाहेर खेचता” अशा शब्दात वसंत मोरे यांनी संताप व्यक्त केला.
“सौम्य लक्षणं म्हणताय.. तुम्ही आला होतात का मॅडम आमच्याकडे बघायला?” असं वसंत मोरे म्हणताच तिथल्या महिला अधिकाऱ्याने स्थायी समितीकडे दिल्याचं सांगितलं. कॅमेराकडे बोट दाखवून महिलेने बंद करण्याची सूचना केली. त्यावर वसंत मोरेंनी भडकून “नाही बंद करणार, माझा हक्क आहे तो” असं उत्तर दिलं. “एका स्त्रीचे फोटो घेण्याआधी तुम्ही परवानगी घेतलीत का?” असा प्रतिप्रश्न महिला अधिकाऱ्याने केला असता आपण फेसबुक लाईव्ह करत असल्याचं मोरेंनी सांगितलं.
पाहा व्हिडीओ
“पाच दिवसात जर मी एकटा साई स्नेह हॉस्पिटलच्या मदतीने एका हॉटेलच्या हॉलमध्ये 40 बेड ऑक्सिजन आणि 40 बेड होम आयसोलेशन हॉस्पिटल चालू करू शकतो, तर मग पुणे महानगरपालिकेच्या 168 नगरसेवकांनी प्रत्येकी फक्त 10 बेड केले असते तर आज संपूर्ण पुणे शहरात 1680 बेड तयार झाले असते. आणि आपण पुणेकरांना वाचवू शकलो असतो. अजूनही वेळ गेलेली नाही.” असं ट्वीट मनसे नगरसेवक वसंत मोरे यांनी केलं आहे.
वसंत मोरेंची कोरोनाग्रस्तांना मदत
याआधीही वसंत मोरे यांनी कोरोनाग्रस्तांना मदतीचा हात दिल्याचं त्यांच्या ट्विटर अकाऊण्टवर दिसतं. 27 वर्षांची तरुणी सिद्धी परदेशी अनेक दिवसांपासून अनेक आजारांनी ग्रस्त. त्यात भरीला भर कोरोनाने गाठलं. तिला पुण्यात बेड मिळाला नाही. तेव्हा मनसे कार्यकर्त्यांनी तिला चाकणला बेड मिळवून दिला. या पोरांसारखे नगरसेवक जर पुणेकरांनी माझ्या साथीला 2022 ला निवडून दिले तर कोरोनासारख्या अडचणीलाही सहज हरवेन, असा विश्वास वसंत मोरे यांनी व्यक्त केला आहे.
पालिका अधिकाऱ्याची गाडी फोडली
कोरोनामुळे निधन झालेल्या नातेवाईकाचे पार्थिव नेण्यासाठी वेळेत रुग्णवाहिका न मिळाल्याने गेल्या वर्षी वसंत मोरे यांनीच पालिका अधिकाऱ्याची गाडी फोडली होती. तेच वसंत मोरे उर्फ ‘तात्या’ भेटायला येणार आहेत, असं समजताच कोरोनामुळे मृत्यू झालेल्या निवृत्त शिक्षकाचं बिलही माफ झालं होतं. खुद्द वसंत मोरेंनीच सोशल मीडियावरुन हा किस्सा सांगितला होता.
संबंधित बातम्या :
रुग्णवाहिका वेळेत न मिळाल्याने संताप, पुण्यात मनसे नगरसेवकाने पालिका अधिकाऱ्याची गाडी फोडली
VIDEO | पुण्यात मनसे नगरसेवकाने करुन दाखवलं, हॉटेलच्या हॉलमध्ये 40 ऑक्सिजन बेडचे हॉस्पिटल
(Pune MNS Corporator Vasant More ruckus over Remdesivir injection to COVID Centers)
