कारागृहातून सूत्रे हलवली, पुण्यात राहण्याची सोय, आंतरराष्ट्रीय डॉनकडून मदत,वाचा कसा रचला सर्व कट
उत्तर प्रदेशातील उमेश पाल खून प्रकरणाचा संबंध आता पुणे शहरापर्यंत आला आहे. या खून प्रकरणातील आरोपी काही दिवस पुणे शहरात होते. असद आणि गुलाम यांना पुण्यात सुरक्षित ठेवण्यात आले होते. आता उत्तर प्रदेश पोलिसांनी दिलेल्या माहितीनंतर पुण्यात शोध मोहीम सुरु झाली आहे.
पुणे : उमेश पाल हत्याकांडातील आरोपी गँगस्टर अतिक अहमद आणि त्याचा भाऊ अशरफ यांना उत्तर प्रदेश पोलिसांनी अटक केली. त्यानंतर अतिक अहमद याचा मुलगा असद याचे एनकाऊन्टर करण्यात आले. असदचा अनेक दिवस पुणे शहरात मुक्काम होता. तो गेल्या २५ दिवसांपासून फरार होता. त्यांच्यावर पाच लाखांचे बक्षीस उत्तर प्रदेश पोलिसांनी जाहीर केले होते. अखेर असद आणि शूटर गुलामला एन्काऊंटरमध्ये ठार मारण्यात आले. या २५ दिवसांमध्ये असीद कुठे होता, त्याची व्यवस्था कोणी केली? याची चौकशी पोलिसांनी सुरु केली. त्यातून धक्कादायक माहिती मिळाली.
अतिकने दिली महत्वाची माहिती
पोलिसांच्या चौकशीत अतिक अहमद याने महत्वाची माहिती दिली आहे. त्याने उमेश पालची हत्या कशी केली, कारागृहातून कशी सूत्रे हलवली, मोबाइल फोन अन् सीमकार्ड कसे मिळवले? ही सर्व माहिती अतिकने पोलिसांना दिली. अतिकने कारागृहातील एका सरकारी अधिकाऱ्याचे नावही सांगितले, ज्याच्या मोबाईल फोन आणि सिमकार्ड तुरुंगात पोहोचवण्याचे काम केले. बरेली तुरुंगात बंद असलेला त्याचा भाऊ अशरफ यालाही शाइस्ता परवीनने मोबाइल आणि सिम पुरवल्याचे अतिकने सांगितले.
दाऊद टोळीच्या संपर्कात
डॉन मुख्तार अन्सारीच्या मदतीने अतिक अहमद दाऊद टोळीच्या संपर्कात आला. यानंतर अतिक टोळीने पाकिस्तानातून शस्त्रास्त्रांचा पुरवठा सुरू केला. असद अन् गुलाम यांच्यांसोबत झालेल्या चकमकीत विदेशी शस्त्रे जप्त झाले. यामुळे आता एनआयए सुद्धा अतिकच्या तपास करू शकते.
असदसाठी असे केले प्रयत्न
उमेश पाल खून प्रकरणानंतर असद आणि गुलाम यांना सुरक्षित ठेवणे हे अतिकसाठी आव्हान बनले होते. मग अतिकने डॉन अबू सालेमच्या जवळच्या व्यक्तींशी अन् माजी खासदार असलेल्या एका मोठ्या राजकारण्याशी त्याने संपर्क केला. असद आणि गुलाम यांची व्यवस्था पुणे शहरात करण्यात आली. त्यासाठी अबू सालेमने मदत केल्याचे वृत्त आहे.
पुण्यात कोण आहेत सालेमची लोक
आतिकचा भाऊ अशरफ आणि इंटरनॅशनल डॉन अबू सालेम यांचे चांगले संबंध असल्याचे सांगण्यात येत आहे. यामुळे असद आणि गुलामला पुण्यात सालेमच्या जवळच्या लोकांसोबत राहण्याची व्यवस्था केली गेली. मुंबई बॉम्बस्फोट प्रकरणी अबू सालेम तुरुंगात आहे. त्याचे नेटवर्क महाराष्ट्रात अजूनही सक्रिय आहे. अबू सालेमच्या सांगण्यावरुन अश्रफला पुण्यात आश्रय दिला गेला होता, अशी माहिती आहे.
पुणे पोलीस सक्रीय
आता पुणे पोलीस अन् महाराष्ट्र एटीएस सक्रीय झाले आहे. अबू सालेम याचे पुण्यातील नेटवर्क शोधण्यात येत आहे. यामुळे काही दिवसांत या प्रकरणात पुण्यातील काही लोकांना अटक होणार आहे.
हे ही वाचा
माफिया असदचे पुणे कनेक्शन आले समोर, पुण्यात अबू सलेम अन् कोणी केली व्यवस्था?
